İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 284 Hüküm no: 199 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’a gelen bal mumu satışına dellâl ve sairlerin karışmaması Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ Galata kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki İstanbul’da vâki‘ mumcu esnâfı Dîvân-ı hümâyûnuma arzuhâl edip bal mumcu esnâfından olup kethüdâ ve ihtiyârlarından cemm-i kesîr ve cem‘-i gafîr meclis-i şer‘de kadîmü’l-eyyâmdan beri Galata gümrüğüne gelen şem‘-i aselden cânib-i mîrî için iktizâ eden mertebesi ifrâz olundukdan sonra mâ‘adâsı esnâfları beyninde kethüdâ ve ihtiyârlar ma‘rifetiyle narh-ı cârî üzre tevzî‘ ve taksîm olunup bu vechile nizâm-ı hâlleri var iken kadîme muhâlif bal mumu dellâlları peydâ ve hâlâ gelen şem‘-i aseli hafiyyeten ziyâde bahâ ile murâd ettikleri muhtekir tâifesine bey‘ etmeleriyle cânib-i mîrîye müzâyaka olduğundan mâ‘adâ beynlerinde ihtilâle bâ‘is oldukları her birleri teşekkî edip fîmâ ba‘d zikr olunan gümrüğe gelen şem‘-i asel cânib-i şer‘den ta‘yîn olunan yağ nâibi ma‘rifetiyle zabt ve hıfz olunup mîrî için iktizâ eden şem‘-i asel ifrâz olundukdan sonra mâ‘adâsı muktezâ-yı kadîm üzre kethüdâ ve ihtiyârları ma‘rifetleriyle beynlerinde tevzî‘ ve taksîm olunup muhtekir tâifesi ve muhdes olan dellâllar def‘ ü ref‘ olunmak bâbında emr-i şerîfim recâ eylediklerin akzâ kuzâtü’l-müslimîn İstanbul kadısı Mevlânâ Mehmed Said -zîde fezâiluhû- i‘lâm etmekle, imdi i‘lâmı mûcebince muhdes olan dellâllar ve muhtekir tâifesi ref‘ olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzre amel edip dahi vech-i meşrûh üzre muhdes olan dellâllar ve muhtekir tâifesi ref‘ ve gümrük-i mezbûra gelen şem‘-i aselden mîrî için şem‘-i asel ifrâz olundukdan sonra mâ‘adâsı muktezâ-yı kadîm üzre esnâf-ı mezbûre kethüdâ ve ihtiyârları ma‘rifetiyle tevzî‘ ve taksîm ettirip hilâf-ı kadîm def‘ ü ref‘ olunan muhtekir tâifesi ve dellâllara müdâhale ettirmeyesin. Şöyle bilesin, alâmet-i şerîfe i‘timâd kılasın. Tahrîren fi’l-yevmi’s-sâmin min şehri Rebî‘ilevvel sene tis‘a ve selâsîn ve mi’e ve elf. Be makām-ı Kostantıniyye el-mahrûse.