İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 291 Hüküm no: 208 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zahire gemilerinin sadece Unkapanı İskelesi’nde yüklerini boşaltmaları Ma‘rûz-ı dâ‘î-i devletleridir ki Sâdır olan fermân-ı âlîleri üzre derûn-ı arzuhâlde mastûr olan zehâyir sefîneleri husûsu pazarbaşılar ve bakkal tâifesi ve pazarcı tâifesi ve sâir tüccârân-ı cem‘-i gafîr ve cemm-i kesîr-i sikātdan tefahhus ve istifsâr olundukda İstanbul’a gelen zehâyir sefîneleri İstanbul ağası iskelesine yanaşmak kadîm olmayıp muhdes olmağın, zikr olunan zehâyir sefîneleri kadîmü’l-eyyâmdan Kapan-ı dakīk iskelesine yanaşıp getirdiği zehâyir kethüdâları ve ustaları ma‘rifetiyle esnâfa tevzî‘ ve narh-ı cârî üzre ibâdullâha bey‘ oluna deyû ihbâr eylediklerinden mâ‘adâ buğday döğücü tâifesinin yedine verilen nizâm defteri zeylinde narh-ı cârîleri icrâ olunmak üzre zehâyir sefîneleri Kapan-ı dakīk’a yanaşıp herkes metâ‘ını kethüdâları ma‘rifetiyle ondan alıp, ibâdullâha bey‘ edip âhar yerden alınmayıp mazbûtü’l-hâl olmak için huzûr-ı âlîlerine i‘lâm olundukda maznûnu düstûrü’l-amel tutulmak üzre sicillâta kayd olunmak bâbında bâlâsına musahhah fermân-ı âlîleri dahi ihsân olunmakla, imtisâlen-leh sicillâta kayd ve zahîre sefîneleri Kapan-ı dakīk iskelesine yanaşıp gayrı mahallere yanaşmamak üzre cümleye tenbîh dahi olunmuşidi. Fermân men lehü’l-emrindir. Fî 10 Rebî‘ilevvel sene 1139.