İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 295 Hüküm no: 213 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tulumbacı şeridi esnafı nizamı Ma‘rûz-ı dâ‘î-i devletleridir [ki] Mahmiye-i İstanbul’da tulumbacı şeridi demekle beyne’n-nâs meşhûr olan kılâbdanlı şerid, mürûr-ı eyyâm ile kalb ve redî olmamak için şeridci tâifesi işledikleri kılâbdanlı şeridi doğru kethüdâları sâhib-i arzuhâl Ali Gerçek’e getirip, ol dahi yoklayıp pâk ve a‘lâ olanları düzleyip ve mühürleye pâk ve a‘lâ olmayıp kalb ve redî olan şeridleri birkaç yerinden kat‘ ve mîrî için girift oluna ve kethüdâ-yı mezbûrun mührü olmayan bey‘ ü şirâ olunmaya ve hizmet-i mezkûre mukābelesinde kethüdâ-yı mezbûr sâdır olan fermân-ı âlîleri üzre her elli dirhem şeridden ancak bir akçe alıp, ziyâde bir nesne almamak üzre beynlerine nizâm verilip ve bu nizâm ba‘de’l-yevm düstûrü’l-amel kılınmak bâbında tuğrâ-yı garrâ-yı sultânî ile muhallâ hükm-i hümâyûn ihsân olunmak bâbında fermân men lehü’l-emrindir. Fî 19 Rebî‘ilevvel sene [1]139.