İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 296 Hüküm no: 214 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İşkembeci esnafının aşçı esnafına ait şirdeni alıp pişirmemesi Ma‘rûz-ı dâ‘î-i devletleridir ki İstanbul’da vâki‘ aşçı ve kebabçı ve çevrenci tâifesinin kethüdâları olan es-Seyyid Mustafa ve yiğitbaşıları İbrahim ve ihtiyârlarından es-Seyyid Ahmed ve Mehmed ve sâirleri meclis-i şer‘de işkenbeci tâifelerinin kethüdâları İsmail b. Selim ve sâir müseccelü’l-esâmî kimesneler muvâcehelerinde, kadîmü’l-eyyâmdan bu âna gelince şirden aşçı metâ‘ı ve aşçıya mahsûs olup işkenbeci tâifesi ahz ve dükkânlarında tabh ve bey‘ edegelmeyip, ancak kendilere mahsûs olan işkenbeyi ahz ve tabh etmek üzre hâlâ yedimizde olan tuğrâ-yı garrâ-yı sultânî ile muhallâ fermân-ı âlî ve hüccet-i şer‘iyye mûcebince şirden ahzından mukaddemâ men‘ olunmuşlar iken mezbûrûn işkenbeciler memnû‘lar olmayıp hîlelerinden nâşî şirden bahâda işkenbeden dûn olup fâide cihetinden kârlarına ziyâdece medâr olmak mülâhazasıyla ahz ve birbirine halt ve tabh ederler deyû teşekkî ve bir kıt‘a fermân-ı âlî ve iki kıt‘a hüccet-i şer‘iyye ibrâz eylediklerinde fi’l-hakīka yedlerinde olan fermân-ı âlî ve hüccet-i şer‘iyyelerine nazar olundukda mezbûrûn işkenbeci tâifesi aşçı tâifesine mahsûs olan şirdeni ahz ve tabh etmemek üzre men‘ olundukları müte‘ayyin olmağın, yedlerinde olan senedleri mûcebince mezbûrûn işkenbeci tâifesine ba‘de’l-yevm şirden ahz ve tabh etmemek üzre kemâ fi’l-evvel tenbîh olunduğu huzûr-ı âlîlerine i‘lâm olundu. Fermân hazret-i veliyyü’l-emrindir. Fî 19 Rebî‘ilevvel sene [1]139.