İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 298 Hüküm no: 217 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aşçı esnafının sirkeli ve sarımsaklı şirden çorbası pişirmemesi Ma‘rûz-ı dâ‘î-i devletleridir ki İstanbul’da vâki‘ işkenbeci tâifesinin kethüdâ ve ihtiyârlarından cemm-i gafîr meclis-i şer‘de biz kadîmü’l-eyyâmdan bu âna gelince dergâh-ı âlî yeniçerilerinin altmış dördüncü cemâ‘atine mahsûs oda neferâtının mîrî zağarlarına bâ fermân-ı âlî kifâyet mikdârı meccânen işkenbe verip mukābelesinde dükkânlarımızda pâk ve zâhir işkenbe ve şirden çorbası tabh ve ibâdullâha bey‘ edegelip ta‘âm tabh eden aşçı tâifesi dükkânlarında metâ‘ları olmak üzre kasab tâifesinden iştirâ eyledikleri şirdeni doldurup ve kavurup tabh eylediklerinde nizâ‘ımız olmayıp lâkin bize mahsûs olan işkenbe çorbası gibi sirke ve sarımsak ile şirden çorbası tabhından mukaddemâ zikr olunan oda ahâlîsi da‘vâ ve ba‘de’t-tefahhus aşçı tâifesi men‘ birle, kıbel-i şer‘den yedimize i‘lâm ve mûcebince emr-i âlî ihsân olunmuşiken, ba‘zı aşçı tâifesi kadîme mugāyir ve emr-i âlîye muhâlif vaz‘ u hareket eder deyû teşekkî edip mazmûnu min külli’l-vücûh takrîrlerine muvâfık yüz otuz [64b] altı senesi târihiyle müverrah bir kıt‘a emr-i âlî ibrâz etmeğin, ber mûceb-i emr-i âlî zikr olunan şirdeni sirke ve sarımsak ile işkenbe çorbası gibi tabh etmemek üzre aşçı tâifesine tenbîh olunduğu, huzûr-ı âlîlerine i‘lâm olundu. Fermân men lehü’l-emrindir. Fî 21 Rebî‘ilevvel sene [1]139.