İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 299 Hüküm no: 218 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâğıtçı ve mühreci esnafı nizamı Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în, Mevlânâ İstanbul kadısı Mehmed Ebû Said -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki kâğıdçılar ve mühreciler esnâflarının nizâmlariyçün mahmiye-i İstanbul’da Sultân Bayezid’de vâki‘ kâğıdçıbaşı el-Hâc Mehmed ve kâğıdçılar kethüdâsı el-Hâc Mustafa b. Mustafa ma‘rifetleriyle yiğitbaşı Molla Ahmed b. Murad ve el-Hâc Mehmed b. İdris ve Ömer b. Mustafa ve el-Hâc Kasım b. Yusuf ve Mehmed b. Mustafa ve el-Hâc Mehmed b. Mustafa ve el-Hâc Ahmed b. İbrahim ve Nurullah b. İbrahim ve el-Hâc Mehmed b. Abdülbâkī ve Karamanî Mustafa b. Derviş ve es-Seyyid Hasan ve Ebûbekir b. Ali ve Mustafa b. Abdülbâkī ve Abdullah b. İbrahim ve Hasan b. Mustafa ve Hüseyin b. İdris ve Hüseyin b. Abdullah ve Mehmed b. Ali ve el-Hâc Mustafa b. Abdullah ve Edirneli el-Hâc Mustafa b. Abdullah ve Molla Ali b. Abdullah ve Molla Mahmud b. Abdullah ve Molla ve Mustafa b. İmâmzâde ve Memiş ve es-Seyyid Mehmed ve Çorbacı Mustafa ve Molla İsmail ve Hüseyin ve es-Seyyid Ali ve Halil ve Molla Ahmed ve el-Hâc Mustafa ve İsmail ve Mahmud Paşa’da vâki‘ el-Hâc Osman ve Küçük Mehmed ve el-Hâc Mustafa ve diğer el-Hâc Mustafa ve el-Hâc Halil ve Seyyid Mustafa ve Osman ve el-Hâc Mehmed b. İbrahim ve el-Hâc Hüseyin ve diğer el-Hâc Hüseyin ve Kara Mustafa nâm kâğıdçıyân esnâfı ile mühreciyândan Mustafa Halîfe b. Mehmed ve Mustafa b. Hamza ve Seyyid İsmail b. Mustafa ve el-Hâc Ali b. Hasan ve Ali b. Halil ve Hasan b. Mustafa ve İsmail b. Veli ve Hüseyin b. Mehmed ve Şaban b. Ali ve Halil b. Resûl ve Tiryâki Mehmed b. Abdullah ve imâm Mehmed b. Ahmed ve Halil b. Osman ve Molla Süleyman b. Osman ve Osman b. İbrahim ve Mehmed b. Hüseyin ve Seyyid Mehmed b. Hüseyin ve Hüseyin b. Veli ve Süleyman b. İbrahim ve İbrahim b. Mustafa ve Mehmed b. Halil ve Halil b. Mehmed ve Hüseyin b. Mustafa ve Hasan b. Mustafa ve Ömer b. Ahmed ve Mahmud b. Mehmed ve Mustafa b. Ali ve Hasan b. Ali ve Mehmed b. Abdullah ve Mustafa b. Hasan ve Ahmed b. Hasan ve Seyyid Musa b. Mehmed ve Halil b. Ömer ve Ömer b. Abdullah ve Ahmed b. Mehmed ve Boşnak Mustafa ve Çınar Halil b. Abdullah ve Kayseriyeli Musa ve Seyyid Mehmed b. Ali ve es-Seyyid Veli b. Ahmed b. Mustafa ve Mehmed Halîfe ve Ahmed b. Mehmed ve Ali b. Veli ve Kara Mehmed b. Muharrem ve Hüseyin nâm mühreciler esnâfı cem‘ ve husûs-ı mezbûr için reisü’l-hattât olan Mirahor imâmı es-Seyyid Mehmed ile sâir hattâtlardan cem‘-i gafîr meclis-i şer‘a varıp mühreci tâifesinin mühreledikleri kâğıdları sabunlu bez ile silip ve çakmaktaşı mühre ile mührelediklerinden nâşî amel-i kitâbetde olan ta‘b u meşakkatlerini izhâr ve ihbâr eylediklerinde cümle ittifâkıyla mühreci tâifesi ba‘de’l-yevm mühreledikleri kâğıdlara sabun sürmeyip ve çakmak taşı mühre isti‘mâl etmeyip, ancak iki nev‘a yemenî? mühre ile mührelenip ve isti‘mâl eyledikleri yemenî mühreler dahi keskin olmayıp düz olup mühreledikleri kâğıdlar pâk ve mücellâ olmak üzre ta‘ahhüd ve ittifâk eylediklerine binâen, mukaddemâ alıgeldikleri ücretlerinden ziyâde ay damga ve alem damga ve büyük İstanbul ve orta İstanbul ve Şabata? kâğıdlarının da özbesine beşer akçe ve üç takyeli ve battâl İstanbul ve fıstık ve İstanbul ve telhîs kâğıdlarının her özbesine onar akçe ücret dahi zam olunup minvâl-i meşrûh üzre mezbûrûna tenbîh olunduğun i‘lâm eylediğin ecilden sen ki Mevlânâ-yı mûmâ-ileyhsin verdiğin nizâm düstûrü’l-amel kılınıp, hilâfına kat‘â ruhsat ve cevâz verilmemek bâbında fermân-ı âlîşânım sâdır olmuşdur. Buyurdum ki ( ) vusûl buldukda, bu bâbda sâdır olan fermân-ı celîlü’l-kadrim mûcebince amel dahi sen ki Mevlânâ-yı mûmâ-ileyhsin vech-i meşrûh üzre verdiğin nizâm fîmâ ba‘d düstûrü’l-amel kılınıp, hilâfına kat‘â ruhsat ve cevâz verilmeyip, mazmûn-ı emr-i şerîfimle âmil olasın. Şöyle bilesin, alâmet-i şerîfe i‘timâd kılasın. Tahrîren [fî] evâsıtı şehri Rebî‘ilevvel sene tis‘a ve selâsîn ve mi’e ve elf. Be makām-ı Kostantıniyye el-mahrûse.