İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 310 Hüküm no: 227 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eminönü’ndeki at kayıkçılarının taşıma işine ve Kürkçükapısı’nda gecelemelerine engel olunmaması Ma‘rûz-ı dâ‘î-i devletleridir ki Mahmiye-i İstanbul’da Eminönü iskelesinde vâki‘ at kayıkçıları tâifesinden ashâb-ı arzuhâl es-Seyyid Ali b. Abdülbâkī ve Ali b. Hasan ve el-Hâc Ahmed b. Bayram ve Mustafa b. Ahmed ve İbrahim b. Ömer ve Hasan b. Mahmud ve Hüseyin b. Mehmed ve Ahmed b. Hüseyin ve sâirleri Dîvân-ı âlî’de ma‘kūd meclis-i şer‘-i âlîde, Istabl-ı âmire tarafından iskele-i mezbûrede mevzû‘ iki aded at kayığının reisleri olan Mehmed Reis mahzarında yedimizde olan hüccet ve i‘lâm ve emr-i şerîf-i vâcibü’l-imtisâl mûceblerince kadîmü’l-eyyâmdan ilâ hâze’l-ân zikr olunan iskelede Istabl-ı âmire tarafından mevzû‘ olan iki aded at kayığı ile bizim tasarrufumuzda olan at kayıkları nevbet ile yük ve yolcu alıp, nizâmımız bu vech üzre muntazam iken mezbûr Mehmed Reis hilâf-ı nizâm ve hüccet ve mugāyir-i fermân-ı âlî nevbete râzı olmayıp siz ancak yük alın ben yolcu alırım deyû te‘addî ve nizâmımızın ihtilâline bâ‘is olduğundan mâ‘adâ feth-i hâkānîden ilâ hâzihi’l-ân iskele-i mezbûrede akşama kalan hâlî kayıklarımız iskele-i mezbûrede gecelemek mümkün olmamakla, mahrûse-i Galata’da Kürkçükapısı iskelesine varıp onda geceleye gelmişiken mezbûr Mehmed Reis hevâsına tâbi‘ birkaç müfsidler ile yek-dil olup zikr olunan Kürkçükapısı’nda gecelemekden men‘ ve ızrâr murâd ederler suâl olunup ber vech-i muharrer nizâm-ı kadîmimiz üzre iskele-i mezbûrede olan nevbetimiz ke’l-evvel beynimizde cârî ve Kürkçükapısı iskelesinde gecelememize bî-vech mümâna‘at etmemek üzre tenbîh olunmak matlûbumuzdur deyû her birinin mazmûnu min külli’l-vücûh takrîrlerine mutâbık hüccet ve i‘lâm ve tuğrâ-yı sultânî ile muhallâ emr-i şerîf-i vâcibü’l-imtisâl ibrâz ve mazmûnlarını mezbûr Mehmed Reis ikrâr ve i‘tirâf etmeğin, ber mûceb-i fermân-ı âlî nizâm-ı kadîmlerine muhâlif vaz‘ u hareket ile bâ‘is-i ihtilâl olmamak üzre Kürkçükapısı iskelesinde gecelemelerine mümâna‘at etmemek üzre mezbûr Mehmed Reis’e tenbîh olundu. El-emru li men lehü’l-emr. Fî 25 Rebî‘ilevvel sene [1]139.