İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 310 Hüküm no: 228 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kömürcülerden Abdurrahman b. Süleyman ve diğerleri hakkındaki şikâyetin asılsız olduğu Ma‘rûz-ı dâ‘î-i devletleridir ki Kömürcü tâifesinden olup mahmiye-i İstanbul’da Balatkapısı hâricinde Keresteciler sûkunda kömür mahzeni olan Abdurrahman b. Süleyman ve bâb-ı mezkûr dâhilinde kömür mahzeni olan Ömer b. Bayram ve Fenerkapısı hâricinde kömür mahzeni olan Tatol zimmî mahzen-i mezkûrlarında taş ve toprak ve ağaç ile mahlût kömürü ibâdullâha narh-ı cârîden ziyâde bahâ ile ibâdullâha bey‘ ederler deyû teşekkî etmeleriyle, mezbûrların keyfiyyet-i hâllerin mahallerinden tefahhus için küttâb-ı mahkemeden irsâl olunan İmâmzâde Mustafa Efendi b. Hüseyin Efendi mehâzin-i mezkûrûnun üzerlerine varıp ol havâlîlerde sâkine olup isimleri cerîdede mazbût yetmiş beş nefer müslimîn ve altmış nefer yahudi ve nasârâdan mezbûrûnun keyfiyyet-i hâllerin tefahhus ve istifsâr eyledikde mezbûrûnun mehâzinindeki yerlerde [68a] olan kömürlerinde kat‘â taş ve toprak ve ağaç olmayıp hâlis kömürdür her bâr narh-ı cârîye ri‘âyet edip ibâdullâha narh-ı cârî üzre bey‘ ederler deyû mezbûrûn Abdurrahman ve Ömer ve Tatol’un hüsn-i hâllerin ihbâr eylediklerinden sonra ba‘de’l-yevm dahi a‘lâ ve hâlis kömürü narh-ı cârî üzre ibâdullâha bey‘ etmek için kethüdâları Eyyûb kefîl olduğunu kâtib-i mezbûr mahallinde tahrîr, ba‘dehû ümenâ-i şer‘ ile meclis-i şer‘a gelip inhâ ve takrîr eyledi, fermân men lehü’l-emrindir. Fî 27 Rebî‘ilevvel sene [1]139.