İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 311 Hüküm no: 229 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Abdülbâki’nin Bayezid ve Mahmud Paşa’daki kâğıtçı ve mührecilere kethüdâ kaymakamı tayin edildiği Mâ fîhi kemâ fîh, harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da Mahmud Paşa ve Sultân Bayezid’de vâki‘ kâğıdçı tâifesinden kâğıdçıbaşı el-Hâc Mehmed b. Ahmed ve yiğitbaşı Molla Ahmed b. Murad ve Ömer Efendi b. Mustafa ve el-Hâc Mehmed b. İdris ve el-Hâc Kasım b. Yusuf ve Mehmed b. Mustafa ve el-Hâc Mehmed b. Abdullah ve el-Hâc Ahmed b. İbrahim ve Nurullah Çelebi b. Abdülbâkī ve el-Hâc Mehmed b. Abdülbâkī ve Ebûbekir Çelebi b. Ali, Karamanî Mustafa Çelebi b. Derviş ve Abdullah Çelebi b. İbrahim ve Hasan Çelebi b. Mustafa ve Hüseyin b. İdris ve Hüseyin Çelebi b. Abdullah ve Edirneli el-Hâc Mustafa Çelebi b. Abdullah ve İmâmzâde Mustafa Çelebi b. ve Memiş Çelebi ve Çorbacı Mustafa Çelebi nâm kimesneler meclis-i şer‘-i hatîr-i lâzımü’t-tevkīrde kâğıdçı ve mühreci hırfetinin bâ berât-ı âlîşân kethüdâları olan Hasan Ağa b. Abdullah hâzır olduğu hâlde yine kâğıdçı tâifesinden işbu râfi‘ü’l-kitâb Mustafa Çelebi b. Abdülbâkī muvâcehesinde her biri takrîr-i kelâm ve ta‘bîr ani’l-merâm edip bundan akdem kāimmakām-ı kethüdâ olan el-Hâc Muslu b. Mustafa nâm kimesne umûrumuzu görmekde izhâr-ı acz etmekle nizâm-ı hâlimiz için merkūm Mustafa Çelebi kāimmakām-ı kethüdâ olmak üzre cümlemiz ihtiyâr ve ittifâk etmeğin ber vech-i muharrer kıbel-i şer‘den ta‘yîn ve mûcebince vesîka tahrîr olunmak murâdımızdır dediklerinde vech-i muharrer üzre iltimâslarıyla merkūm Mustafa Çelebi kâğıdçı ve mühreci hırfeti üzerlerine kāimmakām-ı kethüdâ olmak üzre taraf-ı şer‘den nasb ve ta‘yîn olundukda ol dahi kabûl ve hizmet-i lâzımesini hasbe’l-mu‘tâde edâya ta‘ahhüd etmekle, işbu vesîka bi’t-taleb ketb olundu. Fî 28 Rebî‘ilevvel sene [1]139. Şuhûdü’l-hâl: Mehmed Ağa b. Mehmed, Sâlih Çelebi b. Süleyman, Çalık Mehmed Çelebi b. Abdullah.