İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 313 Hüküm no: 231 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’daki kurabiye, lokum ve revanicilerin nizamı ve isimleri Bâ sah İşbu şürût-ı nizâm ale’d-devâm mer‘î ve düstûrü’l-amel tutulup hilâfına hareket edenler men‘ ve ref‘ olunmak deyû buyruldu. İstanbul’da vâki‘ kurabiye ve lokum ve revânici tâifesinin kethüdâları ma‘rifetiyle ale’l-esâmî tahrîr olunan defterleridir ki ber vech-i âtî zikr olunur. Fi’l-yevmi’l-hâmis aşer min şehri Rebî‘ilevvel sene [1]139. Şehzâdebaşı’nda kethüdâ Molla Mehmed b. el-Hâc Ömer el-Hâc Ahmed b. Mehmed el-Hâc Mehmed b. İsmail Es-Seyyid Süleyman b. Mustafa Lâleli çeşme kurbunda el-Hâc Yasin b. İbrahim Aksaray’da Mehmed Çelebi b. Ebûbekir Yine Aksaray’da Hasan Çelebi b. Halil Yine Aksaray’da Süleyman b. Abdullah Hocapaşalı Mehmed Çelebi b. Hüseyin Uzun çarşıda el-Hâc Halil b. İbrahim Cağaloğlu sarayı kurbunda es-Seyyid Sâlih b. el-Hâc Yahya Bâlâda tahrîr olunan kurabiye ve lokum ve revâni tabh eden tâifeden ma‘lûmü’l-esâmî kimesneler meclis-i şer‘de tabh eyledikleri kurabiyenin her vakıyyesi otuz akçeye ve sükkerî lokumun vakıyyesi yirmi dört akçeye ve revâninin vakıyyesi yirmi dört akçeye bey‘ olunup ziyâdeye bey‘ ile ibâdullâhı ızrâr etmemek üzre tâife-i mezbûreden her biri râzı ve ba‘de’l-yevm üstâda hizmet etmeyip, hâm-dest olan kimesnelere müsâ‘ade ve başka dükkân açtırmayıp açmak murâd eylediklerinde kethüdâ ve ihtiyârları ma‘rifetiyle açtırılır ve narh-ı mezkûru tecâvüz etmemek üzre her biri ta‘ahhüd ve ittifâk etmeleriyle mezbûrûndan her biri âhara kefîl ve kıbel-i şer‘den nizâmlariyçün iltimâslarıyla üzerlerine kethüdâ nasb olunan Molla Mehmed dahi mecmû‘una kefîl olup bu vech üzre beynlerinde nizâm verilmeğin ve nizâm-ı mezkûr düstûrü’l-amel olup hilâfıyla hareket olunmamak bâbında hükm-i hümâyûn recâsında oldukları huzûr-ı âlîlerine i‘lâm olundu. Bâkī fermân hazret-i veliyyü’l-emrindir.