İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 314 Hüküm no: 232 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’daki kebecilerin nizamı ve isimleri Bâ sah İşbu şürût-ı nizâm ale’d-devâm mer‘î tutulup hilâfında hareket edenler men‘ ü def‘ olunmak deyû buyruldu. Mahmiye-i İstanbul’da vâki‘ kebeci tâifesidir ki ale’l-esâmî zikr olunur. Hurrire fi’l-yevmi’l-ışrîn min şehri Rebî‘ilevvel sene tis‘a ve selâsîn ve mi’e ve elf. Kethüdâ el-Hâc Osman b. Mehmed Yigitbaşı İsmail b. Mehmed Ustalardan el-Hâc Süleyman b. Hasan el-Hâc Mustafa b. Osman Mustafa Çelebi b. el-Hâc Osman Mehmed Çelebi b. el-Hâc İsmail Süleyman Çelebi b. Abdullah Es-Seyyid Sâlih Çelebi b. Mehmed Mezbûrûn birbirlerine kefîl ve cümlesine kethüdâları mezbûr el-Hâc Osman kefîl olmuşdur. Hırfet-i mezbûreye mahsûs olup bey‘ ü şirâ eyledikleri metâ‘larıdır ki zikr olunur. Kebe Velense Tiftik kebe İhrâm Kilim Seccâde Benekli seccâde Hırfet-i mezbûrenin nizâm-ı kadîmleri yedlerinde olan hüccet ve i‘lâm ve fermân-ı âlî mantûklarınca, hırfet-i mezbûr erbâbı ancak sekiz nefer olup ve her biri sekizer ve dokuzar sene üstâda hizmet edip san‘atlarını bi tamâmihî öğrenip metâ‘-ı mezbûrun a‘lâ ve ednâsına âlim olup her vechile temyîze kādir usta oldukda cümle ma‘rifetiyle başka çıkıp izin aldıkdan sonra müstakillen dükkâna çıkıp bey‘ ü şirâ edegelip [69a] metâ‘ları olan sâlifü’z-zikr yedi nev‘ metâ‘ taşradan geldikde doğru Kilidhanı’na ve Suluhan’a gelip kethüdâları ve cümle ustaları ma‘rifeti ile semen-i misilleri ile esnâfa tevzî‘ ve taksîm, onlar dahi alıp ednâ fâide ile ibâdullâha bey‘ edip âhar hanlarda ve dükkânlarda ihtikâr olunmayıp ve hâricden gerek müslim ve gerek zimmî ve gerek yahudi tâifeleri metâ‘-ı mezkûra karışmayıp ve hafiyyeten alıp der mahzen ve ihtikâr ve koltukçuluk etmemek üzre beynlerinde tekrâr nizâm verilip ve bu nizâm ba‘de’l-yevm düstûrü’l-amel kılınmak üzre yedlerine tuğrâ-yı garrâ-yı sultânî ile muhallâ hükm-i hümâyûn ihsân buyurulmak bâbında fermân men lehü’l-emr hazretlerinindir. Fî 20 Rebî‘ilevvel sene [1]139.