İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 315 Hüküm no: 233 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul kadayıfçıları kethüdâlığına Osman b. Musa’nın tayini Allahü hasbî Mâ fîhi kemâ fîh, harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da vâki‘ kadayıfçı tâifesinden el-Hâc Ömer b. el-Hâc Ahmed ve Seyyid Ali b. Mehmed ve el-Hâc Mustafa b. el-Hâc Ömer ve es-Seyyid Mehmed b. Mustafa ve diğer es-Seyyid Mehmed Beşe b. Ömer ve es-seyyid Hüseyin b. Mehmed ve el-Hâc Receb b. Selim ve Süleyman b. Kasım ve es-Seyyid Mehmed b. Hacı Ahmed ve el-Hâc Ömer b. el-Hâc Ahmed ve el-Hâc İsmail b. el-Hâc Mehmed ve es-Seyyid Mehmed b. Abdülkerim ve Musa Beşe b. Receb nâm kimesneler meclis-i şer‘-i şerîfde her biri takrîr-i kelâm ve bast-ı merâm edip beynimizde olan umûrumuzu rü’yet ve ikāmete kethüdâmız olmamakla umûrumuz muhtel olmağın, işbu bâ‘isü’l-vesîka Osman b. Musa nâm kimesne mütedeyyin ve müstakīm ve beynimizde cârî umûrumuzu rü’yet ve ikāmete kādir kimesne olmağla nizâm-ı hâlimiz için üzerimize kethüdâ nasb ve ta‘yîn olunup kıbel-i şer‘den yedine vesîka tahrîr ve i‘tâ olunmak matlûbumuzdur dediklerinde makrûn-ı mezbûrun iltimâslarıyla nizâm-ı hâlleriyçün mezbûr Osman kıbel-i şer‘den üzerlerine kethüdâ nasb ve ta‘yîn olundukda ol dahi kabûl ve hizmet-i lâzımesin kemâ-yenbağī edâya ta‘ahhüd etmeğin, mâ hüve’l-vâki‘ bi’t-taleb ketb olundu. Fî 25 min şehri Rebî‘ilevvel sene [1]139. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Sâlih b. Süleyman, Eyyûb b. Mehmed, Kasım b. Ali.