İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 317 Hüküm no: 235 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hançerli ve Eğrikapı fırınlarında sadece çörek çeşitleri pişirilmesi Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în, Mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki seyyidetü’l-muhadderât iklîletü’l-muhassenât tâcü’l-mestûrât Hemşîre Hatice Sultân -dâmet ismetuhümâ-nın kethüdâsı kıdvetü’l-emâcid ve’l-a‘yân Mehmed -zîde mecduhû- Dîvân-ı hümâyûnuma arzuhâl edip sultân-ı müşârün-ileyhânın evkāfından Ayvansaray kapısı hâricinde olan kebîr ekmekçi fırınının kadîmî peşkünlerinin ekserisi Balat’da ve ol etrâfda ba‘zı mahallerde vâki‘ olmağla fırın-ı mezbûrda tabh olunan nân-ı azîz zikr olunan peşkünlerde füruht olunup ümmet-i Muhammed’e ve sâir ibâdullâha zarûret çekdirmeyip, zikr olunan peşkünlerin kurblarında olan Hançerli ve Eğrikapı semtlerinde olan küçük fırınlarda kadîmü’l-eyyâmdan beri çörek ve börek ve simid işleyen küçük fırınlarda nân işlememek üzre nizâm verilip çörek ve börek ve simid tabh eyleyip nân tabh eylememek üzre bundan akdem emr-i şerîf-i âlîşânım sâdır olmuşiken, itâ‘at-i emr-i âlîşân eylemediklerinden nâşî mukaddem verilen nizâma mugāyir zikr olunan küçük fırınlarda hâlâ nân tabh olunup bilâ-izin cümlenin nizâmına mugāyir hareket ile mukaddemâ verilen nizâmın ihtilâline bâ‘is olduklarından gayrı sultân-ı müşârün-ileyhânın vakıf fırınlarında tabh olunan nân-ı azîz füruht olunmayıp kesr vermekle fırın-ı mezkûr müste‘cirleri îcârelerin vermediklerinden fırın-ı mezbûrların ibtâline bâ‘is ve vakf-ı şerîfin mahsûlüne küllî noksan terettüb edip gadr olmağla mukaddemâ verilen nizâm mûcebince men‘ olunması bâbında emr-i şerîfim verilmek recâ etmeğin, Hazîne-i âmire’de mahfûz olan başmuhâsebe defterlerine nazar olundukda sultân-ı müşârün-ileyhânın tasarruflarında olan Baba Ali ve Eyyûb Ensârî ve Kürkçü çeşmesi fırınlarında nân-ı azîz tabh olunmak üzre verilen nizâm defterinde mukayyed olduğu derkenâr ve müşârün-ileyhânın mutasarrıf oldukları Baba Ali ve Eyyûb Ensârî ve Kürkçü çeşmesi fırınları nizâm-ı cedîd defterinde mukayyed ve civârlarında vâki‘ Hançerli ve Eğrikapı fırınlarının somun tabhına delâlet eder sicill-i mahfûza izin kaydı bulunmayıp somun tabhından men‘ ve yağlı çörek ve sâir nesne tabh edip somuncu umûruna müdâhale eylememek üzre sen ki Mevlânâ-yı mûmâ-ileyhsin i‘lâm eylemen ile âmedî i‘lâmın mûcebince amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim [70a] üzre amel edip dahi sultân-ı müşârün-ileyhânın Baba Ali ve Eyyûb Ensârî ve Kürkçü çeşmesi fırınlarında nân-ı azîz tabh olunmak üzre nizâm-ı cedîd defterinde mukayyed ve civârlarında vâki‘ Hançerli ve Eğrikapı fırınlarının somun tabhına delâlet eder izin kaydı bulunmamağla mezkûr Hançerli ve Eğrikapı fırınlarında somun tabh ettirmeyip men‘ ve yağlı çörek ve sâir nesne tabh ettirip somuncu umûruna bir türlü müdâhale ettirmeyesin. Şöyle bilesin, alâmet-i şerîfe i‘timâd kılasın. Tahrîren fi’l-yevmi’r-râbi‘ aşer min şehri Rebî‘ilevvel sene [1]139. Be makām-ı Kostantıniyye el-mahrûse.