İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 318 Hüküm no: 236 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kuş kafesçi esnafının nizamı Ma‘rûz-ı dâ‘î-i devletleridir ki Mahmiye-i İstanbul’da Kuş kafesçi hırfetinin kethüdâları olan sâhib-i arzuhâl Mustafa meclis-i şer‘de hırfet-i mezbûre erbâbından usta İbrahim ve usta Mehmed ve usta Ali ve usta Mustafa ve usta Hüseyin ve sâirleri mahzarlarında, bizim hırfetimiz beyninde nizâmımız muhtel ve müşevveş olup ihtilâl üzre olmağın ba‘de’l-yevm içimizden pîr-i perver olmayıp hâm-dest olanlar müstakillen dükkân açmayıp bir usta yanında şâkird ve yâhud halîfe olup san‘atı bi tamâmihî öğrenip kethüdâmız ve ustalarımız ma‘rifeti ile izin verilip başka çıkıp pîr-i perver oldukdan sonra kethüdâ ma‘rifetiyle bir münâsib mahalle dükkân açıp san‘atını işleyip, narh-ı cârîmiz üzre bey‘ olunmak için beynimizde ittifâk ve ittihâd eyledik dediklerinde hırfet-i mezbûre beynlerinde vech-i meşrûh üzre nizâm verilip nizâm-ı mezkûr ba‘de’l-yevm düstûrü’l-amel kılınmak bâbında yedlerine tuğrâ-yı garrâ-yı sultânî ile muhallâ hükm-i hümâyûn ihsân buyurulmak bâbında fermân hazret-i veliyyü’l-emrindir. Fî gurreti Rebî‘ilâhir sene [1]139.