İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 324 Hüküm no: 241 Orijinal metin no: [71b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Malta fırını yakınında civardaki diğer fırınlarca tabla ve iskemle açılmaması Ma‘rûz-ı dâ‘î-i devletleridir ki Mahmiye-i İstanbul’da Pirinççi Sinan mahallesinde vâki‘ Malta fırını demekle ma‘rûf fırında nân tabh olunmak üzre izni müş‘ir civârında vâki‘ üç mahalle ahâlîsinin iltimâslarıyla mukaddemâ tuğrâlı fermân-ı âlî sâdır olmağın, mûcebince hâlâ fırın-ı mezbûrda nân tabh olunup dahl ü ta‘arruza mecâl olmayıp hâssü’l-hâs nân-ı azîz narh-ı cârîsi üzre işletip ibâdullâh râzı ve hoşnûdlar iken, havâlîsinde vâki‘ fırınların ba‘zıları tarafından tabla ile ekmek bey‘ ve iskemleler ihdâsına tesaddî etmeleriyle fîmâ ba‘d ol havâlîde kadîmî olan iskemleden mâ‘adâ tabla ve iskemle vaz‘ıyla te‘addî ve tecâvüz edenler kolluk tarafından ahz olunup ta‘zîr-i şedîd ile men‘ ü zecr ve fırın-ı mezkûrda nân-ı azîz tabh olunmasının ibâdullâha nef‘-i azîm olup gāyet lüzûm ve iktizâsı olmak takrîriye ile bu dahi mukaddemâ nizâm verilip başmuhâsebeye kayd olunan fırınlar i‘dâdından ma‘dûd olup fîmâ ba‘d ilâ mâşâ’allâh ta‘arruz-ı âhardan her vechile masûn olup hilâfına bir türlü vaz‘ u hareket olunmamak üzre muhâsebe-i merkūmeye kayd olunmak bâbında hükm-i hümâyûn recâsında oldukları huzûr-ı âlîlerine i‘lâm olundu. Bâkī fermân men lehü’l-emrindir. Fî 12 şehri Rebî‘ilevvel sene [1]139.