İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 334 Hüküm no: 251 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yenicami yakınındaki fırın ekmeklerinin on beş iskemlede satılacağı Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în İstanbul kadısı Mevlânâ Mehmed Ebû Said -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki, savb-ı şer‘den irsâl olunan Mustafa -zîde ilmuhû- mahmiye-i İstanbul ihtisâbı mukāta‘ası ümenâsına mahsûs olan çardakda emîn odasına varıp müseccelü’l-esâmî müslimîn mahzarlarında akd-i meclis-i şer‘ ettikde, mahmiye-i mezbûre hısnı ebvâbından Balıkpazarı ve Zindankapısı ve Odunkapıları hâriclerinde vâki‘ esvâk ahâlîlerinden müsin ve ihtiyâr ve mevsûkun-bihim ve mu‘temedün-aleyhim olan kimesnelerden cemm-i gafîr ve cem‘-i kesîr meclis-i ma‘kūd-ı mezkûrda her biri takrîr-i kelâm ve ta‘bîr ani’l-merâm edip zikr olunan çardağa mahsûs olan iskeleye ve kurbunda pirinç bey‘ olunan sûka ve sebzehâne semtinde tulumbacı limanına akreb sevâhil-i bahrden deryâya dökülen mezâbil mürûr-ı ezmine ile iskele-i mezbûra mülâsık tûlen beş ve arzen dört zirâ‘ ve sûk-ı mezkûra mülâsık tûlen dört ve arzen iki zirâ‘ ve liman-ı mezkûra mülâsık tûlen dört ve arzen iki zirâ‘ mikdârı mahallerin üzerlerinde ve atılan lâşe dahi zikr olunan mahallerde kalıp ta‘affün edip revâyih-i kerîhasından ol mahallerden mürûr eden nâs müteezzîler oldukların ve zikr olunan mahzûrların bi’l-külliye indifâ‘ı zikr olunan üç mahallerde etmekçi iskemleleri binâ ve vaz‘ olunup zikr olunan mahallere karîb Balıkpazarı kapısı dâhilinde Yeni câmi‘ fırını demekle ma‘rûf fırında tabh olunan ekmeklerden zikr olunan iskemlelerde ekmek bey‘ olunmak enseb ve evlâ olup nâsa nef‘-i mahz idiği bi’l-icmâ‘ ve’l-ittifâk husûs-ı mezbûrun husûl ve itmâmını taraf-ı Devlet-i aliyyemden sen ki Mevlânâ-yı mûmâ-ileyhsin sana ta‘yîn ve fermânım olmasını recâ ve niyâz eylediklerin, mezbûr Mustafa mahallinde tahrîr ve meclis-i şer‘a gelip tarafına haber verdiği ve kadîmden olan yeni çarşı başında sarrâf köşesinde ve Balıkpazarı hâricinde balıkçılar karşısında ve gümrük önünde ve balık pazarı hâricinde Yahudiler sûkunda ve Bahçekapısı’nda ve Tahtakale’de pazarcı dükkânında ve Esirhanı kurbunda ve Saray-ı atîk kurbunda ve Okçularbaşı’nda ve Ayazmakapısı hâricinde ve Kapan-ı dakīkde saçak altında Paye yeri nâm mahallerde olan iskemleler müceddeden vaz‘ olan üç aded iskemleye mülhak olup cem‘an on beş aded iskemlelerde zikr olunan Yeni câmi‘ kurbunda tabh olunan ekmekden bey‘ olunması için emr-i şerîfim verilmek recâsına i‘lâm etmekle, i‘lâmın mûcebince amel olunup hilâfından ihtirâz olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vusûl buldukda bu bâbda sâdır olan fermân-ı celîlü’l-kadrim ve i‘lâmın mûcebince amel edip hilâfından ihtirâz eylesin. Şöyle bilesin, alâmet-i şerîfe i‘timâd kılasın. Tahrîren [fî] evâsıtı şehri Rebî‘ilâhir li sene tis‘a ve selâsîn ve mi’e ve elf. Be makām-ı Kostantıniyye el-mahrûse.