İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 345 Hüküm no: 263 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kehhalbaşı Hasan’ın Topkapı’da ekmekçi fırını açmasına izin verilmesi Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în İstanbul kadısı Mevlânâ Şeyhzâde Mehmed -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki, kıdvetü’l-ulemâ’i’l-muhakki[kīn] hâlâ hâssâ kehhâlbaşı Hasan -zîde ilmuhû- südde-i sa‘âdetime arzuhâl edip mûmâ-ileyh Topkapısı dâhilinde bir küçük kârgîr ekmekçi fırını binâ, lâkin ol tarafda seyyidetü’l-muhadderât iklîletü’l-muhassenât cü’l-mestûrât Emine Sultân -dâmet ismetuhâ-nın ekmekçi fırını olmağla ol havâlîde muhdes fırınlar men‘ olunup ve mûmâ-ileyhin fırını dahi nizâma dâhil olmadığından nân tabhına ba‘zı kimesne mümâna‘at ve ta‘tîline bâ‘is olmalarıyla sultân-ı müşârün-ileyhâ tarafında başağası vesâtatıyla arzuhâl ve istîzân eyledi ki mûmâ-ileyhin fırını kendilerin fırınına muzır olmayıp kadîmî fırınlara ilhâk ve nân tabh olunmasına izin ve ruhsat verildiğin bildirip, ol bâbda istid‘â-yı inâyet olmağın sicill-i mahfûza nazar olundukda fırın-ı merkūm muhdes olmağla mukaddemâ verilen nizâma idhâlinde fermân-ı âlîye muhtâc olduğun[dan] sen ki Mevlânâ-yı mûmâ-ileyhsin i‘lâm etmekle i‘lâmın mûcebince mukaddemâ verilen nizâma dâhil olmamakla müceddeden idhâl ve kayd olunmak bâbında fermân-ı âlîşânım sâdır olmuşdur. Buyurdum ki, vusûl buldukda bu bâbda vech-i meşrû‘ üzre şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olasın. Şöyle bilesin, alâmet-i şerîfe i‘timâd kılasın. Tahrîren [fî] evâili Cemâziyelevvel li sene seb‘a ve selâsîn ve mi’e ve elf. Be makām-ı Kostantıniyye el-mahrûse.