İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 366 Hüküm no: 269 Orijinal metin no: [82a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yedikule dışındaki öküz kasapları ustalarının isimleri Bâ sah Fîmâ ba‘d işbu şurût-ı nizâm ale’d-devâm mer‘î ve mukayyed tutulup düstûrü’l-amel olmak üzre İstanbul kadısı fazîletlü Efendi’nin sicillâtına kayd ve bir sûreti izzetlü yeniçeri ağası tarafına verilip hîn-i iktizâda mürâca‘at olunmak buyruldu. Zikr-i âtî husûsun nizâmları sâdır olan fermân-ı âlî mûcebince bu fakīre havâle buyurulmağın, imtisâlen-lehû dergâh-ı âlî -dâme mahfûfen bi’l-avni’r-Rabbânî- yeniçerileri üzerine çavuşu olan fahrü’l-eşbâh Mahmud Çavuş ile ma‘an Yedikule hâricinde hâlâ kasablar kethüdâsı Mehmed Kethüdâ’ya mahsûs odaya varıp akd-i meclis olundukda Yedikule hâricinde vâki‘ kasabân-ı gâv selhhânelerinin ustalarıdır ki ber vech-i âtî zikr olunur. Fi’l-yevmi’s-sâbi‘ min Şa‘bâni’l-mu‘azzam li sene erba‘în ve mi’e ve elf. Hâlâ kasab gâv kethüdâları Ebûbekir Kethüdâ b. el-Hâc İbrahim’in yedinde mülkü olan selhhânedir ki mezbûrûn şerîklerin beyân olunur; Süleyman Yazıcı b. Ömer Osman Yazıcı b. Hasan Mehmed Yazıcı b. el-Hâc İbrahim Mezbûrûn Ebûbekir Kethüdâ ve Süleyman Yazıcı ve Mehmed Yazıcı ve Osman Yazıcı şerîkler olmağla her biri âhara kefîl olduğu tescîl olunur. el-Hâc İsmail b. el-Hâc Süleyman’ın yedinde olan selhhânedir ki mezbûr ve şerîkleri kethüdâ-yı mezbûr Ebûbekir Kethüdâ ma‘rifetiyle tahrîr olundu; el-Hâc Ahmed b. el-Hâc Mehmed Mustafa Yazıcı b. el-Hâc Süleyman Mezbûrûn Hacı İsmail ve Hacı Ahmed ve Mustafa Yazıcı şerîkler olmağla her biri âhara ve kethüdâ-yı mezbûr Ebûbekir mezbûrûna kefâleti tescîl olundu. Semâîzâde el-Hâc Mehmed b. Mustafa’nın yedinde olan selhhânedir ki kethüdâ-yı mezbûr Ebûbekir ma‘rifetiyle tahrîr olundu; Ali b. Mustafa Süleyman Yazıcı b. İbrahim Mezbûrûn el-Hâc Mehmed ve Ali ve Süleyman Yazıcı şerîkler olmağla her biri âhara ve kethüdâ-yı ( ) mezbûrûna kefâleti tescîl olundu. Abdurrahman b. el-Hâc Halil ve şerîki Abdullah b. el-Hâc Halil’in selhhâneleridir ki her biri âhara ve kethüdâ-yı mezbûr Ebûbekir mezbûrûna kefâleti tescîl olundu. Mûytâbzâde el-Hâc Mehmed b. Halil’in yedinde olan selhhânedir ki mezbûr şerîkleri kethüdâ-yı mezbûr Ebûbekir ma‘rifetiyle tahrîr olundu; Mehmed b. Hacı İbrahim el-Hâc İbrahim b. Mustafa ve el-Hâc Ahmed b. Mehmed ve Panayot v. Yamandi zimmî Mezbûrûndan her biri âhara ve kethüdâ-yı mezbûr Ebûbekir mezbûrûnun mecmû‘una kefâleti tescîl olundu. Halil b. Abdullah ve es-Seyyid İbrahim b. Osman Bey ber vech-i iştirâk selhhâneleridir ki mezbûr Ebûbekir ma‘rifetiyle tahrîr olundu. Bâlâda mastûrü’l-esâmî kethüdâ ve ustaların zikr olunan selhhânelerinde hâlâ mevcûd gılmânânı olmayıp kendi tasarruflarında olmağla eyyâm-ı sayfda selhhânelerinde ricâl iktizâ edip selhhânelerine gılmânân-ı kasab istîcâr eylediklerinde yarar kefîlleriyle alıp mechûlü’l-ahvâl olan eşhâsı fîmâ ba‘d selhhânelerine komamak üzre kavl ü ittifâk ve ahd ü mîsâkları bu mahalle şerh verildi.