İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 397 Hüküm no: 280 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Don yağı ve çerviş yağının narhı Bâ sah İ‘lâmı mûcebince yirmi iki akçeye don yağı ve yirmi sekiz akçeye çerviş yağı bey‘ olunmaya ruhsat verilmek buyruldu. Fî 27 Receb sene [1]144. Ma‘rûz-ı dâ‘îleridir ki Bundan akdem bu dâ‘îleri don yağı ahvâlini mevsûkun-bih kimesnelerden tefahhus eyledikde Tuna sevâhilinde don yağı şirâ eden bâzirgânlar şirâlarında mu‘tâd-ı kadîm her beş yedek don yağının yedi çerviş yağı olup mecmû‘u don yağı hesâbına iştirâ ederler imiş busene-i mübârekede çerviş yağı ve don yağı mahallerinde on sekizer akçeye iştirâ olunmuş, bu tarafa geldikde yirmi iki akçeye don yağını ve otuzar akçeye çervişi bey‘ etmeleriyle bu hesâb üzre nef‘leri zâhir olduğuna binâen don yağının her vakıyyesinde iki akçe tenzîl olunmuşidi el-yevm her beş yedek don yağında iki üçü çerviş zuhûr edip bâzirgânları bakkallara otuz akçeye bey‘ eyledikleri ve bu vechile intifâ‘ları müte‘ayyin ve Murad Ağa kulları mübâşeretiyle gelen i‘lâmlarda Hırsovi iskelesinde don yağı on dokuz akçeye ve Poloş? iskelesinde on dokuz akçeye ve Ziştovi’de on sekiz akçeye ve İsmail geçidi’nde on sekiz akçeye ve İbrail’de on dokuz akçeye ve Kalas iskelesinde on sekiz akçeye ve Niğbolu iskelesinde on yedi buçuk akçeye iştirâ eylediklerin senedâtları mübeyyin ancak don yağı tüccârının mu‘tâdları dâimâ insâfdan udûl edip hattâ bundan akdem dahi hâlâ mumcular kethüdâsı olan bizim yedimizde olan çerviş yağına don yağı deyû müdâhale edersen seni kethüdâlıkdan azl ve dahi nice cezâlara bâ‘is olacak ihâfe ile tahvîf edip beynlerinde merkūmu kırk kîse akçeye nezre kesmişler ve hâlâ don yağı bâzirgânlarından verilen narha adem-i itâ‘at edip ısrâr edenlerden Silistreli Kalın? Hacı Ahmed ve Tophâneli oğlu Hacı Mustafa ve bakkal Hasan nâm kimesneler sâirleri tahvîf edip ısrârlarında ittifâklarına bâ‘is olduklarını hâlâ mum nâibimiz dâ‘îleri dahi haber vermişdir ve mezbûrlar ba‘de’l-münâza‘a mübâşir-i merkūm Murad Ağa muvâcehesinde yirmi iki akçeye don yağı ve yirmi sekiz akçeye çerviş yağını vermeye râzı oldular, ancak muharrerü’l-esâmî kimesneler ziyâde tama‘larından bu makūle cem‘iyyete bâdî oldukları için ıslâh-ı nefs edince kal‘abend olunmak ensebdir. Emr men lehü’l-emrindir.