İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 69 Hüküm no: 2 Orijinal metin no: [1-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekke-i Mükerreme payeli Edirne Kadısı Neylizade Mehmed Hamid Efendi’nin İstanbul Kadılığına tayin olunması Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în Mekke-i Mükerreme pâyesiyle Edirne kādısı Neylîzâde Mevlânâ Mehmed Hamid -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki sen ehl-i ilm ve sâhib-i fazîlet olup her vechile müstahakk-ı inâyet ve şâyeste-i âtıfet olduğun ecilden hâliyâ hakkında mezîd-i inâyet-i aliyye-i şâhâne ve ömr-i yed-i re’fet-i seniyye-i pâdişâhânem zuhûra getirilip işbu bin yüz yetmiş dokuz senesi Recebi’l-ferdi gurresinden avâtıf-ı aliyye-i mülûkâne ve avârif-i behiye-i hüsrevânemden şeref-bahş-ı zuhûr olan hatt-ı hümâyûn-ı şevket-makrûnum mûcebince İstanbul kazâsı sana tevcîh ve inâyet edip i‘lâm için ta‘yîn olunmuşdur. Buyurdum ki hatt-ı hümâyûn-ı şevket-makrûnum ile sâdır olan fermân-ı celîlü’l-kadrim mûcebince te’hîr ve tevakkuf etmeyip zikr olunan İstanbul kazâsına sen mutasarrıf olasın. Şöyle bilesin alâmet-i şerîfime i‘timâd kılasın. Tahrîren fi’l-evâhir-i Cumâdelâhire li-sene tis‘a ve seb‘în ve mi’ete ve elf.