İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 75 Hüküm no: 14 Orijinal metin no: [5-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusçuklu Mehmed’in Süleyman b. Abdullah aleyhindeki alacak davasında anlaşma sağlanması Tuzca Mukāta‘ası Emîni Hezargrad kādısının kethüdâsından iki yüz elli guruşa ibrâ. Mahmiye-i İstanbul’da Balkapanı’nda sâkin Ruscuklu es-Seyyid el-Hâc Mehmed b. Hüseyin Çarşamba günü dîvân-ı hazret-i Sadr-ı âsafî’de akdolunan meclis-i şer‘-i şerîf-i enverde Hezargrad kādısı olup bundan akdem fevt olan Dede Mehmed Efendi’nin zamân-ı kazâsında kethüdâsı olan işbu bâ‘isü’l-kitâb Süleyman b. Abdullah mahzarında ikrâr-ı tâm ve takrîr-i kelâm edip târîh-i kitâbdan on üç ay mukaddem ben Hezargrad havâlîsinde Tuzca Mukāta‘ası mültezimi olmağla işbu mezbûr Süleyman benim için seni mukāta‘a ahâlîsi istemez da‘vâcındır diyerek zabtım için Hezargrad Mahkemesi’nde rüşvet tarîkiyle malımdan yedi yüz elli guruşumu ahz ü istihlâk etmekle taleb ve da‘vâ sadedinde olduğumda ol dahi cevâbında sen meblağ-ı mezbûrun beş yüz guruşunu müteveffâ-yı mezbûr Mehmed Efendi için ve otuz guruşunu harc-ı hüddâm için vermekle emrinle mahâllerine teslîm ve benim için ancak elli guruş vermiş idin demekle beynimizde münâza‘ât-ı kesîre vâki‘ olmuş idi. El-hâletü hâzihi beynimize Müslimîn tavassut edip beni da‘vâ-i meşrûhamdan iki yüz elli guruş mukābelesinde sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr iki yüz elli guruş mezbûr Süleyman yedinden tamâmen ahz u kabz edip iddi‘â eylediğim yedi yüz elli guruşu müte‘allıka âmme-i da‘vâ ve kâffe-i mutâlebâtdan gerek mezbûr Süleyman’ın ve gerek müteveffâ-yı mezbûr Mehmed Efendi’nin oğlu hâzır bi’l-meclis Molla Mehmed Sadık’ın ve gerek sâir veresenin zimmetlerini ibrâ-i âmm-ı-kātı‘ü’n-nizâ‘la ibrâ ve iskāt eylediğimde onlar dahi kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-şehri Recebi’l-ferd li-sene [1]179 Şuhûdü’l-hâl: Molla Osman, Yusuf Çavuş, Molla İsmail b. Ali, Mehmed b. Ahmed, Araboğlu Mehmed b. Hacı Mehmed, Kethüdâ-i Muhzırân el-Hâc Mehmed, Numan Efendi ve gayruhum mine’l-huzzâr.