İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 76 Hüküm no: 15 Orijinal metin no: [5-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Hasan’ın, vefat eden Canbaz Ali’de olan alacağı hususunda varisleri İbrahim ve diğerleri ile anlaşması Hazret-i Eyüb’de vâki‘ menzil semeninden iki yüz elli guruşa ibrâ. Ma‘rûz, Eyüb’de Kasım Çavuş mahâllesi sâkinlerinden sâbıkā mehterbaşı sâhib-i arzuhâl el-Hâc Ali b. el-Hâc Hasan tarafından vech-i âtî üzere da‘vâ ve kabza ve sulh ve ibrâyı ikrâra vekîl olduğu Mustafa b. Abdullah ve diğer Mustafa b. İbrahim nâm kimesneler şehâdetleriyle sâbit olan Ömer Ağa b. Abdullah arz odasında huzûr-ı hazret-i âsafânelerinde ma‘kūd meclis-i şer‘-i enverde mahmiye-i İstanbul’da Kırkçeşme kurbünde Hüsam Bey mahâllesinde sâkin iken on ay mukaddem vefât eden Canbaz Ali b. Mirza Abdullah’ın verese-i münhasırası ve zikri âtî menzile vaz‘-ı yedleri mütehakkık olan kebîr oğlu es-Seyyid İbrahim kendi nefsinden asıl ve zevcesi Hanife bt. Osman ile kebîre kızı Hafize taraflarından müseccel vekîlleri es-Seyyid Ali ile terâfu‘larında vakf-ı mezbûr mütevellîsi Mustafa Efendi tarafından vekîli Câbî Abdülgani b. İbrahim hâzır olduğu hâlde zikr olunan Hüsam Bey Vakfı’ndan olup mahâlle-i mezbûrede orta? ortalarda vâki‘ etrâf-ı erba‘ası Kasab Ahmed ve Doğramacı Ahmed ve Mehmed menzilleri ve tarîk-i hâs ve âm ile mahdûd menzil dört hisse i‘tibârıyla bir hissesi zevce-i mezbûre Hanife ve selâse-i erbâ‘ı müteveffâ-yı mezbûr Canbaz Ali üzerinde iken mezbûr Canbaz Ali müvekkil-i mezbûr el-Hâc Ali’den karz yüz doksan yedi fındık ve yaldız altını ve kıymetini yevm-i kabzda iki yüz on guruş olan bir sîm raht alıp mukābelesinde menzil-i mezkûrda [6] olan hissesini ve zevcesi mezbûrenin bi’r-rızâ hissesiyle ma‘an ferâğ bi’l-vefâ tarîkiyle müvekkil-i mezbûr el-Hâc Ali’ye bâ-ma‘rifet-i mütevellî ferâğ ve kable’t-tahliye beher şehr on beşer guruş icâre kavliyle mezbûr Canbaz Ali hîn-i fevtine dek elli ay menzil-i mezkûrda sâkin olup şuhûr-ı mezkûrda müctemi‘a olan yedi yüz elli guruşun yüz otuz beş guruşunu teslîm ve bâkī altı yüz on beş guruş ile deyn-i merkūmu kable’l-edâ fevt olduğu verese-i mezbûrûn i‘tirâf ve ikrârlarıyla sâbit ve zâhir olup lâkin hîn-i icârda tahliye ve teslîm bulunmamağla icâre-i merkūme lâzım gelmeyip ancak deyn-i merkūm edâ olunca menzil-i mezkûru tahliye ve müvekkil-i mezbûra teslîme verese-i mezbûrûna tenbîh olunmuş idi. Hâlâ beynleri tevfîk olunup vekîl-i mezbûr bi’t-terâzî dâ‘iyânede meclis-i şer‘-i enverde verese-i mezbûrûn es-Seyyid İbrahim ve zevcesi Hanife ve bint-i mezbûre Hafize’ye malından teberru‘an iki yüz elli guruş verdikde onlar dahi bi-kadri’l-hısas iki yüz elli guruşu ahz u kabz ve menzil-i mezkûra ve müvekkil-i mezbûrun makbûzu olan yüz otuz beş guruş icâreye müte‘allıka âmme-i da‘vâdan müvekkil-i mezbûr el-Hâc Ali’nin zimmetini ibrâ-i küllî ile ibrâ ve menzil-i mezkûru bâ-re’y-i mütevellî tahliye ve mezbûr el-Hâc Ali’ye kat‘â ferâğ ile teslîme müte‘ahhid olduklarında vekîl-i mezbûr dahi zikr olunan altınlara ve raht kıymetine ve icâre-i merkūmeye müte‘allıka kezalik âmme-i da‘vâdan verese-i mezbûrûnun zimmetlerini bi’l-vekâle ibrâ ve iskāt ve her biri âharın ibrâsını kabûl ve bu minvâl üzere kat‘-ı münâza‘a eyledikleri tescîl olunup mübâşiri çavuş kulları iltimâsıyla huzûr-ı âlîlerine i‘lâm olundu. El-emrü li-men-lehü’l-emr. Fî 17 Receb sene [1]179.