İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 77 Hüküm no: 16 Orijinal metin no: [6-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un menzilini Süleyman Ağa’ya satması Sultân Selim kurbünde mübâya‘a. Mahmiye-i İstanbul’da Sultân Selim Câmi‘-i şerîfi kurbünde Çerâğī Hamza mahâllesi ahâlîsinden Âişe Hatun bt. Lütfullah Efendi b. Mustafa’nın oğlu ve tarafından husûs-ı âti’l-beyanda vekîl olduğu zât-ı mezbûreyi bi’l-ma‘rifeti’ş-şer‘iyye ârifân Hâfız Numan Efendi b. Mehmed ve Mehmed b. Mehmed şehâdetleriyle sâbit olan es-Seyyid Mehmed Rasih b. Mustafa meclis-i şer‘-i şerîf-i enverde hâlâ Medîne-i Üsküdar Ustası fahrü’l-akrân bâ‘isü’l-kitâb Süleyman Ağa b. Hasan mahzarında ikrâr-ı tâm ve takrîr-i kelâm edip medîne-i mezbûrede Kādıasker mahâllesinde vâki‘ bir tarafdan İsmail Çelebi veresesi mülkleri ve bir tarafdan Mecnune Meryem Hatun menzili ve iki tarafdan tarîk-i âm ile mahdûd dâhiliyede fevkānî ve tahtânî dört oda ve sofa ve mağsel ve kenîf ve havlu ve bahçe ve derûnunda matbâh ve fevkinde bir sagīr oda ve köşk ve bi’r-i ma’ ve hâriciyede ulyâda ve vüstâda dört oda ve sofa ve kenîf ve ahır ve matbâh ve bir mikdâr havluyu müştemil bir bâb menzil akd-i âti’z-zikrin sudûruna değin müvekkilem mezbûrenin yedinde mülk olmağla müvekkilem mezbûre Âişe Hatun menzil-i mahdûd-ı mezkûru cemî‘ müştemilâtıyla tarafeynden îcâb ve kabûlü hâvî şurût-ı müfside ve uhûd-ı mübtıladan ârî bey‘-i bâtt-ı sahîh-i şer‘î ile merkūm Süleyman Ağa’ya bin üç yüz guruşa bey‘ ü temlîk ve teslîm, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezkûr bin üç yüz guruş yedinden bi’t-tamâm ahz u kabz ve istîfâ eyledi. Fîmâ-ba‘d menzil-i mahdûd-ı mezkûr merkūm Süleyman Ağa’nın mülk-i müşterâsı ve hakk-ı sırfı olup müvekkilem vâlidem mezbûre Âişe Hatun’un kat‘â alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Recebi’l-ferd sene [1]179. Şuhûdü’l-hâl: Abdurrahman Ağa, el-Hâc Ömer b. Hasan, Pazarbaşı el-Hâc Yusuf, Muhzırlar Kethüdâsı el-Hâc Mehmed, Tahtacı Osman Çelebi, Molla Ahmed, Muhzır Mehmed.