İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 78 Hüküm no: 17 Orijinal metin no: [7-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a sabun göndermeleri hususunda sabuncu esnafından İbrahim ve ortaklarına tenbihte bulunulması Sabun bazergânları isti‘câl-i mektûb tahrîrine ta‘ahhüd Ma‘rûz, İşbu mektûbda bu dâ‘îlerine hitâben sâdır olan fermân-ı âlîşâna imtisâlen hâmiş-i mektûbda tahrîr olunan maddeye kemâ-hüve hakkuhû ashâb-ı vukūfunu tahsîl asîr olmağla tahkīke resîde olmadığından mahmiye-i İslambol’da Suluhan’da Kandiye tüccârından olup Hanya’da ve Kandiye’de şerîkleri olan es-Seyyid İbrahim ve Mehmed Beşe ve Molla Hüseyin ve Nebis Beşe ve Derviş Ömer ve Sarrâc Mehmed ve Ali Bey meclis-i şer‘e ihzâr ve istintâk ve istîfsâr olundukda şerîklerine Âsitâne-i aliyye’ye sabun irsâli için mektûb tahrîriyle avk u te’hîr eyledikleri ve eğer bundan sonra ederlerse te‘dîb olunacakları ifâde olundukda fî-mâ-ba‘d ucâleten Âsitâne-i aliyye’ye sabun irsâli için şerîklerine müekked mekâtib tahrîrine ihtimâm ile ta‘ahhüd ve ittifâk eyledikleri tescîl olunup ber-mûceb-i fermân-ı âlîşân huzûr-ı âlîlerine i‘lâm olundu. Fî 20 B sene [1]179.