İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 79 Hüküm no: 18 Orijinal metin no: [7-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmeğin fiyatı hususunda arzuhal sunan şahsın fırıncılar tarafından araştırılması Nân-ı azîzin narhına dâir Rikâb-ı hümâyûn’a arzuhâl eden ma‘lûm olmadı. Ma‘rûz, Nân-ı azîzin narhına dâir birkaç gün zarfında mübârek Rikâb-ı müstetâba verilen arzuhâlin hâmişinde sâdır olan fermân-ı âlîşâna imtisâlen mahmiye-i İstanbul’da ekmekçiler kethüdâsı ve nizâm ustaları ve sâir yüz elli neferden mütecâviz mazbûtü’l-esâmi ekmekçiler meclis-i şer‘-i şerîfe ihzâr ve mazmûn-ı emr-i âlîşânı gereği gibi kendülere tefhîm olunarak arzuhâl-i mezkûru vermeğe cesâret eden kimesne tefahhus ve istifsâr olundukda hamdullâhi’r-râzık eyyâm-ı adâlet-penâh-ı hazret-i sultânide zehâirimiz vâfire ve bi’l-iktizâ taraf-ı Devlet-i aliyyeye ilticâ eylediğimiz bi’l-cümle umûr ve husûsumuza müsâ‘ade-i aliyye buyrulup bu gûne sû-i edebi mûcib bir hâl olmamakla arzuhâl-i mezkûrdan aslâ haber ve âgâhımız yokdur ve içimizden kim olduğu dahi ma‘lûmumuz olmamağla tecessüs edip içimizden ise aslâ ketm ü ihfâ etmeyip her kim olursa olsun ma‘lûmumuz olduğu anda ahz u te‘dîb için hükkâma ihzârına mübâderet ederiz deyü her biri ta‘ahhüd ve ittifâk etdiklerinden mâ‘adâ fî-mâ-ba‘d bizim adımız ile rikâb-ı müstetâba bu misillü arzuhâl eden olur ise lillâhi ve rasûlihî derhâl ahz ve lâzım gelen te‘dîbâtı icrâ olunmasını istid‘â-yı tâm ile istid‘â ederiz deyü istirhâmları bi’l-ilhâh iltimâslarıyla huzûr-ı âlîlerine i‘lâm olundu. Fî 20 B sene [1]179.