İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 79 Hüküm no: 19 Orijinal metin no: [7-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesli Hatun’un inşa ettirdiği evinden Şerbetçi Lütfullah’ın evinin harem kısmının görüldüğü ve bu durumun tahta perde ile giderilmesi Keşf der-kurb-ı Cerrâhpaşa Ma‘rûz, Vârid olan fermân-ı âlîlerine imtisâlen kıbel-i şer‘-i şerîfden meb‘ûs müderrisîn-i kirâmdan keşif nâibimiz es-Seyyid Halil Efendi hâssa mi‘mârlarından Ebubekir Halîfe ve Osman Halîfe ve sâir mazbûtü’l-esâmi Müslimîn ile Şerîfe Nesli Hatun bt. Mehmed’in mahmiye-i İstanbul’da Cerrâhpaşa Câmi‘-i şerîfi kurbünde Kürkçübaşı mahâllesinde vâki‘ Kürkçübaşı Mescid-i şerîfi müezzini vakfından tasarrufunda olan ma‘lûmü’l-hudûd arsanın üzerine müceddeden binâ ve ihdâs eylediği menzile varıp akdeylediği meclis-i şer‘-i münîrde vakf-ı mezkûr mütevellîsi hâzır olduğu hâlde menzil-i mezkûrun tabaka-i ulyâsında vâki‘ iki odasının altı pencere ve vüstâda vâki‘ kezâlik iki odasında altı penceresinden ve süflâda vâki‘ bir odasının iki penceresinden arzuhâl eden Şerbetçi el-Hâc Lütfullah b. Hasan’ın menzilinin makarr-ı nisvân olan odalarının mevâzi‘i görünüp havâle zarârı olduğu bi’l-müşâhede sâbit ve zâhir olup ve havâle-i mezkûre tahta perde ile def‘ olur deyü mi‘mârân-ı mezbûrân ba‘de’l-ihbâr merkūme Nesli Hatun dahi havâle-i mezkûresini def‘e ta‘ahhüd eylediğini mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm olundu. Fermân men-lehü’l-emrindir. Fî 18 Receb sene 1179.