İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 80 Hüküm no: 20 Orijinal metin no: [8-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici Davit’in inşa etmiş olduğu evin Ekmekçi Bihter ve Canbaz Abkar’ın menzillerinin harem kısmına bakan pencerelerinin kapatılması Keşf der-kurb-ı Salmatomruk Vârid olan fermân-ı âlîşânlarına imtisâlen kıbel-i şer‘-i şerîfden meb‘ûs müderrisîn-i kirâmdan keşif nâibimiz es-Seyyid Halil Efendi mi‘mâr hulefâsından İsmail ve Osman nâm kimesneler ve sâir mazbûtü’l-esâmi Müslimîn ile derûn-ı arzuhâlde mezkûr Dikici Davit nâm zimmînin mahmiye-i İstanbul’da Salmatomruk kurbünde Kefeli mahâllesinde vâki‘ el-Hâc Osman Ağa Vakfı’ndan tasarrufunda olan ma‘lûmü’l-hudûd menzilin üzerine binâ ve ihdâs eylediği odaya varıp akdeylediği meclis-i şer‘-i münîrde vakf-ı merkūm mütevellîsi hâzır olduğu hâlde merkūm Davit’in ihdâs eylediği odanın üç penceresinden arzuhâl sâhiblerinden Ekmekçi Bihter ve Canbaz Abkar nâm zimmîlerin sokak aşırı menzillerinin makarr-ı nisvân olan mevâzi‘i görünüp havâle zarârı olduğu bi’l-müşâhede sâbit ve zâhir olup havâle-i mezkûre tahta perde ile def‘ olmayıp ancak sed ile def‘ olunur deyü mi‘mârân-ı mezbûrân ba‘de’l-ihbâr merkūm Davit dahi havâle-i mezkûresini def‘a ta‘ahhüd eylediğini mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm [olundu]. Fî 5 min-Receb sene 1179.