İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 80 Hüküm no: 21 Orijinal metin no: [8-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da bulunan yumurtacı esnafının yumurtayı bakkallara ve halka belirlenen fiyatlar ile satmaları Sene-i mezbûrede yumurtaya verilen nizâm Mahmiye-i İstanbul’da vâki‘ bakkāl dükkânlarında yumurtanın nedreti olup ve Zindankapısı ve Odunkapısı’nda taşradan gelen yumurtayı dükkânlarında iddihâr edenler beher yüzünü kırk beş ve kırk altı paraya bakkālâna bey‘ eylediklerini yakīnen meclis-i şer‘e inhâ olunmakdan nâşî sicill-i mahfûza nazar olundukda yetmiş târîhinde zikr olunan Zindankapısı ve Odunkapısı hâricinde yumurtacı esnâfı meclis-i şer‘e gelip sûkları ahâlîsinden biri mahzen ve mağazalarında yumurta ihtikâr etmeyip ve ol vakitde dahi narh-ı rûzîsi olan beher yüzünü doksan akçeye bakkālâna bey‘, onlar dahi dânesini birer akçeye ibâdullaha fürûht ve bir akçe ziyâdeye bey‘ etmeyip ve etdirmeyip ve içlerinden biri narh-ı mezkûrdan ziyâdeye bey‘ ve ihtikâr ederse hükkâma ihbâr eylemesini cümlesi ittifâk ve ta‘ahhüd edip bu nizâmın mugāyiri her kim hareket ederse sûklarından ihrâc ve müstahak olduğu cezâsı hakkında icrâ olunmak üzere cümlesi râzı ve birbirlerine kefil olduklarını nâtık i‘lâm sûreti mukayyed bulunmağla zikr olunan kapılar hâricinde olan esnâf-ı merkūmeden kethüdâ vekîli el-Hâc Ahmed ve el-Hâc Hüseyin ve el-Hâc Mehmed ve diğer el-Hâc Mehmed ve el-Hâc Süleyman ve Mustafa ve Ahmed Yazıcı ve Mehmed Yazıcı ve el-Hâc Musa ve diğer Mehmed Yazıcı ve el-Hâc Mahmud ve el-Hâc Murtaza ve es-Seyyid Mehmed ve Süleyman Yazıcı ve diğer el-Hâc Ahmed ve İsmail ve Ömer Beşe Meclis-i şer‘-i şerîfe ihzâr ve muvâcehelerinde i‘lâm-ı mezkûrun mefhûmu kendülere tefhîm olunarak ber-vech-i muharrer narh-ı rûzîden ziyâde bey‘ etmemeleri ifâde olundukda her biri kemâ-fi’l-evvel narh-ı rûzîsi olan doksan akçeye bakkālâna bey‘ ve onlar dahi dânesini birer akçeden yüz akçeye ibâdullaha fürûht eyleyip ve İznikmid ve sâir yumurta gelen mahâllerde olan şerîklerine vech-i meşrûh üzere peyderpey Âsitâne-i aliyyeye yumurta nakil olunmak üzere mekâtib tahrîrine ve mahzen ve mağazalarında aslâ yumurta ihtikâr ve ibâdullahı bu vechile ızrâr edilmemek üzere ta‘ahhüd ve ittifâk eyleyip lâkin İznikmid’de taşra kurâdan yumurta getirenler beher yüzünü otuz beşer ve otuz altışar paraya bey‘ eyledikleri ve nedret üzere getirdikleri mesmû‘umuz olmağla vech-i meşrûh üzere narh-ı rûzîsi olan seksen akçeye bey‘ olunup İznikmid’den ve ol tarafdan iddihâr olunmayıp vefret üzere Âsitâne-i aliyye’ye nakil ve tesyîr olunması bâbında İznikmid kādısına hitâben müekked emr-i alîşân sudûrunu istid‘â ve istirhâm eyledikleri iltimâslarıyla huzûr-ı âlîlerine i‘lâm olundu. Fî 20 Receb sene [1]179.