İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 88 Hüküm no: 30 Orijinal metin no: [12-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Langa Yenikapı’sında dışarıya ekmek satışının yasaklanmasının faydalı olduğu Langa Yenikapısı’nda taşraya nân-ı azîz verirler deyü hilâf inhâlarını i‘lâm Sâdır olan fermân-ı âlîlerine imtisâlen derûn-ı arzuhâlde iştikâ olunan maddenin hakīkati için mahâll-i mezkûre bâb nâibimiz es-Seyyid Mehmed Efendi dâ‘îleri ta‘yîn ve irsâl olunup ol dahi husûs-ı mezbûra mübâşir olan Halil Ağa ve sâir ümenâ-yı şer‘le Langa Yenikapısı hâricinde iskelede vâki‘ mahzene varıp isimlerini tahrîr ve zabt eylediği iskele-i mezbûre ahâlîsinden madde-i merkūmeyi gereği gibi tefhîm ederek suâl etdikde madde-i merkūmeden ve işbu arzuhâlden aslâ haber ve âgâhları olmayıp lâkin işbu arzuhâlden mukaddem derûn-ı kal‘adan ekmek ihrâcı ile memnû‘ habbâz tâifesinin medhalleri olmak ihtimâli ağlebdir deyü haber verdiklerini ketb ü inhâ eyleyip derûn-ı kal‘adan bargir ve sepet ve tabla ile fürûht için ekmek ihrâcında sefâine kadr-ı kifâyeden ziyâde ekmek fürûhtu ihtimâli olup ve bu hâlet fi’l-hakīka ibâdullahın refâh ve rahatına mâni‘ [13] olacak müzâyakaya bâ‘is olması melhûz olmağla bundan akdem derûn-ı kal‘adan ekmek ihrâc olunmamak üzere emr-i âlî ile verilen nizâm emr-i müstahsen olduğu huzûr-ı âlîlerine i‘lâm olundu. Fî 24 min-Receb sene 1179.