İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 95 Hüküm no: 41 Orijinal metin no: [19-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul, Galata, Eyüb, Üsküdar ve Kasımpaşa’daki mumcular esnafı haricinde koltukçu esnafının mum imal etmemesi Ma‘rûz, Sâdır olan fermân-ı âlîlerine imtisâlen derkenârlara dikkat ve tahrîrle nazar olundukda İstanbul ve Galata ve Eyüb ve Üsküdar ve Kasımpaşa’da mecmû‘u mumhâneler hisseleri tasrîhiyle ta‘dâd olunup ve Evkāf-ı hümâyûn-ı hazret-i cihândârîden Ayazma’da bir bâb ve Paşabahçesi’nde bir bâb ve Tekfursarayı’nda bir bâb ki cem‘an üç bâb mumhâne dahi bâ-hatt-ı hümâyûn-ı şevket-makrûn binâ ve ihyâ buyrulup hanlarda ve odalarda ve sâir mahûf ve muhâtaralı mahâllerde yağ hissesi ve kârhânesi olmayan ba‘zı koltukçular işlemek hatt-ı hümâyûn-ı itâ‘at-makrûnla memnû‘âtdan olup ve mütenebbih olmayanın te‘dîb olunmak şurûtlarından iken şimdi mahûf ve muhâtara olan mahâllerden İslambol’da ve Galata ve Eyüb ve Üsküdar ve Kasımpaşa’da ta‘yîni olmayan ba‘zı koltukçu tâifesi hilâf-ı şurût-ı hatt-ı hümâyûn ve fermân-ı âlîşân kalb ve redî mum işleyip ibâdullahı ızrâr ve mumcu esnâfının kâr ü kisblerine mâni‘ ve nizâm-ı kadîmlerinin ihtilâline bâ‘is olmalarıyla tâife-i mezbûrenin kemâ-fi’s-sâbık ol makūle mahûf mahâllerde kalb ve redî mum işlemekden men‘ ve te‘dîb olunmaları bâbında derkenârlarda olan evâmir-i aliyye ve şurûtları derc ve mumhâneler ta‘dâd olunarak İslambol ve Galata ve Eyüb ve Üsküdar kādıları efendilere hitâben müceddeden fermân-ı âlîleri sudûrunu mumcu esnâfı istid‘â eyledikleri ber-mûceb-i emr-i âlî huzûr-ı âlîlerine i‘lâm olundu. Fî 29 Cumâdelâhire sene 1180.