İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 96 Hüküm no: 42 Orijinal metin no: [19-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan b. Salih’in varislerinden Ayşe’nin davalı olduğu gemi kaptanı Ali Pir’in Trabzon’da kadı huzurunda muhakeme olunmak üzere taahhütte bulunması Ma‘rûz, Trabzon ahâlîsinden olup dört sene mukaddem fevt olan el-Hâc Salih oğlu Hasan’ın veresesinden olup kendi tarafından asıl evlâd-ı sıgārı Mustafa ve Ömer ve Osman’ın vasileri olan sulbî kebîr oğlu Ahmed tarafından Âsitâne’de Kurşunlu Mahzen önünde merbût on sekiz arşın çapında [20] şayka ta‘bîr olunur sefînenin bi’l-istihkāk da‘vâsına vekâlet iddi‘â eden sâhibe-i arzuhâl Âişe Çarşamba günü dîvân-ı âlîlerinde sefîne-i mezkûreye vâzı‘ü’l-yed olan Trabzonlu Ali Pîr nâm reisden da‘vâya tasaddî edip evvelâ vekâletini isbât için ikāme eylediği iki nefer kimesneler edâ-yı şehâdet edemeyip ve şâhid-i âhar ikāmeti için müddet-i medîd istimhâl etmekle sefîne-i mezkûre tüccâr sefînesinden olup hamlle meşhûn ve Trabzon’a azîmet edip te’hîri fermân-ı âlîşân ile memnû‘ olmağla merkūm Ali Pîr Trabzon’a varıp müvekkil-i mezbûr ile bi-nefsihi Trabzon kādısı huzûrunda murâfa‘a ve da‘vâları ne vechile faysal bulur ise i‘lâm getirmeğe ta‘ahhüd edip ve ta‘ahhüd-i mezkûru üzere nefsine Alacahamam kurbünde bakırcı tâifesinden es-Seyyid Ahmed ve el-Hâc Mahmud nâm kimesneler kefil, onlara dahi mahâll-i mezkûrda Bakırcı İsmail kefil ona dahi Kapan bazergânlarından Öküzoğlu el-Hâc İbrahim kefil olmağla vech-i meşrûh üzere sebîlî tahliye olunmak bâbında emr ü fermân hazret-i men-lehü’l-emrindir. Fî 29 Cumâdelâhire sene 1180.