İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 97 Hüküm no: 43 Orijinal metin no: [20-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden kürkçü Yorgi’nin vasisi ortağı olan Dimitri ile hesaplarının görüşülmesi Ma‘rûz, Kürkçü bazergânlarından olup bundan akdem İstanbul’da hâlik olan derkenârda mezkûr Yorgi v. Hıristo nâm zimmînin düyûn-ı kesîresi olmağla terekesinden düyûnu sâhiblerine edâya ve bâkīsini vârisi li-ebeveyn karındaşı Dimoş nâm zimmîye îsâl için vasîsi olan Dimitri ma‘rifetiyle yetmiş dokuz Saferi’nde askerî kassâmı tarafından tereke-i mevcûdesi tahrîr ve defter olundukda on bin iki yüz akçeye bâliğ olup düyûnuna vefâ etmemekle vâris-i merkūm Dimoş meclis-i şer‘-i şerîfe gelip tereke-i merkūma vaz‘-ı yed etmediğini ve adem-i istihlâsını ba‘de’l-ikrâr vasiyy-i merkūm Dimitri hâlik-i merkūmun kürkçülük san‘atında inânen şerîki arzuhâl eden İstati v. Hıristo tarafından vech-i âtî üzere vekîli olduğu Todori v. Yani ve Hıristo v. diğer Yani nâm zimmîler şehâdetleriyle mahzar-ı hasm-ı câhidde sâbit olan oğlu Kostanti zimmî muvâcehesinde hâlik-i merkūmun dâyinlerinden olup terekesinden yirmi bin guruş iddi‘â eden Gümüş Dimo ve altı bin iki yüz yirmi guruş iddi‘â eden Londo v. Kericse tarafından vekîli Yani hazır oldukları hâlde müvekkil-i merkūm İstati ve vasîsi [21] olduğum hâlik-i mesfûr ile on iki seneden beri altı bin guruş sermâye hâlik ve üç bin beş yüz guruş sermâye merkūm İstati’nin olup fâidesi beynlerinde berâber olmak üzere şerîk olmalarıyla hâlik-i merkūm Yorgi Moskov tarafından kürk iştirâ ve bu tarafda merkūm İstati’ye irsâl ol dahi bey‘ ve semenini kabz etmekle bundan akdem merkūm dâyinler ve patrik ma‘rifetleriyle hesâblarını rü’yet eylediklerinde sinîn-i mezkûrede fâideden üzerinde yirmi yedi bin guruş çıkmakla edâ-yı deyni için bi’l-vesâyet taleb ederim deyü da‘vâ, vekîl-i merkūm dahi cevâbında merkūm dâyinler hesâb-ı mezkûru rü’yet eylediklerinde müvekkilim mesfûrun hâlik-i merkūma asl-ı deyni zuhûr etmeyip lâkin merkūm Yorgi’nin Moskov tarafından iştirâ ve irsâl eylediği kürkleri altı ay va‘de ile irsâl etmekle merkūm İstati dahi bu tarafda bey‘ ve altı ay tamâmında semenini irsâl edemeyip bu müddet yedinde kalmağla müddet-i mezkûrede i‘mâl olunsa fâide-i hâsıla olur idi deyü sinîn-i mezkûrede i‘mâl olunmayan evkātın murâbahasını hesâb ve ol mikdâra bâliğ olmağla deyni olmak zu‘muyla dâhil-i defter etmişler idi deyüp defterleri ihzâr ve rü’yet olunmak esnâsında vasiyy-i merkūm Dimitri gaybet ve ihtifâ edip bir vechile ihzârı mümkün olmamağla merkūm dâyinlerin hukūkunu rü’yet için bir kayyûm nasbının şer‘an lüzûmuna binâen bi’t-taleb kıbel-i şer‘-i şerîfden Mustafa b. İsmail nâm kimesne kayyûm nasb olunup merkūmlar huzûrlarında defterleri rü’yet ve kendilerine kırâet ve tercüme etdirildikde fi’l-hakīka yirmi beş bin guruş sinîn-i mezkûrede sermâyeden merkūm Estati’nin yedinde ibkā eylediği müddetin murâbahası ve iki bin guruşu dahi hâlik-i merkūmun sermâyesi olan altı bin guruşa bâliğ olunca merkūm İstati’nin sermâyesi olan üç bin beş yüz guruşun noksânı iki bin beşyüz guruşun fâidesi hesâbı olduğu tarafeynin ikrâr ve tasâdikleriyle müte‘ayyin olmağın bu sûretde vekîl-i mesfûrun ibrâz eylediği fetvâ-yı şerîfe mantûkunca meblağ-ı mezkûr metâ‘-ı merkūmun fâidesi olmayıp bi’l-ilzâm ribâ-yı mahz kabîlinden olup düyûn-ı sahîhadan olmamağla şer‘an lâzım gelmediği merkūm dâyinlere tefhîm olundukda bazergânlar beynlerinde hesâb bu minvâl üzere görülüp ve merkūm İstati kable’l-hesâb bize emir edip hesâbımızı rü’yet edin, hesâbınız üzere ne çıkarsa deynimizdir deyü ikrâr etmekle biz dahi minvâl-i meşrûh üzere iki nefer bazergânlar ile ma‘an hesâb görüp hattâ hesâb defterimizde ikrâr-ı mezkûrun sıhhatine Patrikin yazısı dahi vardır deyü verdikleri cevâbları muhâlif-i şer‘-i mutahhar olduğu huzûr-ı âlîlerine i‘lâm olundu. Fî 29 C sene 1180.