İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 98 Hüküm no: 44 Orijinal metin no: [22-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin, Emetullah Hatun’un sakin olduğu evin duvarına yapmış olduğu havuzu yıkarak duvarı ve ocağını eski haline getirmeyi taahhüt etmesi Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz es-Seyyid Halil Efendi dâ‘îleri Hâssa mi‘mârlarından Ebubekir ve İsmail halîfeler ve sâir ümenâ-yı şer‘le mahmiye-i İstanbul’da Kocamustafapaşa mahâllesinde vâki‘ arzuhâlde mezkûrü’l-ism Basmacı Mehmed Çelebi b. el-Hâc Murtaza tasarrufunda olan menzile varıp huzûr-ı Müslimînde akdeylediği meclis-i şer‘-i hatîrde sâhibe-i arzuhâl Emetullah Hatun bt. Ebubekir Efendi tarafından vekîl olduğu Musa Efendi b. Mustafa ve es-Seyyid Abdullah b. Abdurrahman şehâdetleriyle sâbit zevci Hâfız Hüseyin Efendi b. Hasan mezbûr Mehmed Çelebi muvâcehesinde mezbûr Mehmed Çelebi işbu mu‘âyene olunan menzil ittisâlinde müvekkilem mezbûrenin müstecirleri sâkin olduğu mülk menzili duvarı ittisâlinde bir havuz ihdâs ve duvarının bir mikdâr mahâllini hedm ve kadîmden isti‘mâl olunagelen ocağını dahi isti‘mâlden men‘ eder deyü ba‘de’d-da‘vâ ve’l-mu‘âyene ve’l-ikrâr mezbûr Mehmed Çelebi duvar-ı mezkûr ittisâlinde ihdâs eylediği havuzu ref‘ ve hedm eylediği duvarı ke’l-evvel binâ ve mezkûr ocağı dahi isti‘mâlden men‘ eylememek üzere ta‘ahhüd ve bu vechile kat‘-ı nizâ‘ eylediklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 27 C sene [1]180.