İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 99 Hüküm no: 45 Orijinal metin no: [22-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros’un komşusu Emetullah Hatun’un menziline olan zararını gidermek hususunda taahhütte bulunması Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz es-Seyyid Halil Efendi dâ‘îleri Hâssa mi‘mârlarından Ebubekir ve İsmail halîfeler ve sâir ümenâ-yı şer‘le mahmiye-i İstanbul’da Kocamustafapaşa mahâllesinde vâki‘ arzuhâlde mezkûr revgancı Bedros v. Sanan zimmî tasarrufunda olan menzile varıp akdeylediği meclis-i şer‘-i hatîrde sâhibe-i arzuhâl Emetullah Hatun bt. Ebubekir Efendi tarafından vekîl olduğu zâtı ârifân Musa Efendi b. Mustafa ve es-Seyyid Molla Abdullah b. Abdurrahman şehâdetleriyle sâbit zevci Hâfız Hüseyin Efendi b. Hasan mesfûr Bedros zimmî muvâcehesinde merkūm Bedros işbu mu‘âyene olunan menzilin sakfını hedm ve enkāzını müvekkilem mezbûrenin müstecirler sâkin olduğu menzilinin duvarı dibinde yığmağla hâsıl olan zarârını def‘ eylesin deyü iddi‘â eyledikde mesfûr Bedros zikr olunan enkāzı <> mahâll-i mezkûrdan ba‘de’r-ref‘ sakf-ı mezbûru hedmi hasebiyle hâsıl olan zarârını dahi def‘e rızâsıyla mübâderet eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 21 C sene [1]180.