İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 99 Hüküm no: 46 Orijinal metin no: [22-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evkaf-ı hümayuna mülhak Paşabahçe Mumhanesinin yağ hissesine zam yapılması Berây-ı zamîme-i hisse-i revgan hisse-i revgan-ı kadîm, mumhâne-i hadîka-i Paşa der-kurb-ı karye-i İncirli an-Evkāf-ı Hümâyûn-ı hazret-i şehriyârî ki an-Kapan-ı Galata ve İstanbul ki der-hîn-i tevzî‘-i mumhânehâ-i Hisar-eş, Rumeli ve Yeniköy ber-vech-i nisâb-ı mukaddem dâde ve ta‘ahhüd-kerdeend ve hâlâ hisse-i kadîmeş hisse zam ve dâde fermûde. El-vâki‘ der-sene 1180 ber-mûceb-i arzuhâl ve i‘lâm-ı Mehmed İzzet Efendi mütevellî-i evkāf-ı hümâyûn ve i‘lâm-ı Mehmed Hamid Efendi kādı-i İstanbul el-müverrah fî 21 C sene 1180. Kayd ve sûret dâde fermûde bâ-fermân-ı âlî 2 Hisse-i kadîm 2 zam bâ-fermân-ı âlî 4 Evkāf-ı hümâyûn-ı hazret-i cihândârîde Paşabahçesi’nde vâki‘ mumhânenin İstanbul ve Galata kapanlarında iki hissesine iki hisse dahi zammolunmak ol havâlîde olan ibâdullaha enfa‘ olduğunu Yoros Nâibi Mehmed Efendi i‘lâm ve taraf-ı vakf-ı hümâyûna dahi zarârı melhûz olmayıp [i]‘mârına sebeb olacağını kāimmakām-ı vakf-ı hümâyûn Mehmed İzzet Efendi kezâlik i‘lâm etmeleriyle sâdır olan fermân-ı âlîye imtisâlen mumcular kethüdâsı ve sâir ustaları meclis-i şer‘-i şerîfe ihzâr ve istintâk olundukda fi’l-hakīka mezkûr mumhâneye iki hisse kifâyet etmeyip iki hisse dahi zammolunması muktezî olduğunu ihbâr etmeleriyle vech-i meşrûh üzere mahâlline kayd ve mezkûr mumhâne için ba‘de’l-yevm dört hisse yağ verilmek iktizâ eylediğini müş‘ir İstanbul kādısı fazîletlü Mehmed Hamid Efendi i‘lâm etmeleriyle i‘lâmlarına binâen iki hisse dahi zammolunup ba‘de’l-yevm dört hisse yağ verilmek için fermân-ı âlîşân sâdır olmağın kalemine kayd ve sûret verilmek fermân buyrulmağın mûcebince iki hisse dahi zam ve dört hisse yağ verilmek için kaydolunup işbu sûret verildi. Fî-gurreti Receb sene 1180.