İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 100 Hüküm no: 47 Orijinal metin no: [23-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasab Halil Camii’nin yanına yapılan binanın camiye zararı olduğundan yıkılması Ma‘rûz, Sâdır olan fermân-ı âlîlerine imtisâlen cânib-i şerî‘at-ı garrâdan keşif nâibimiz müderrisîn-i kirâmdan es-Seyyid Halil Efendi dâ‘îleri irsâl, ol dahi Davudpaşa kurbünde Toptaş mahâllesinde vâki‘ Kasab Halil Câmi‘-i şerîfine varıp huzûr-ı Müslimînde akdeylediği meclis-i şer‘-i şerîf-i enverde vakf-ı şerîf-i mezbûr mütevellîsi Halil Efendi b. Ramazan tarafından vekîl-i şer‘îsi Mehmed Ağa b. Abdullah, câmi‘-i şerîf-i mezbûrun Kıble tarafında olan arsaya muttasıl bir bâb menzile mutasarrıf olan mu‘arrefetü’z-zât Fâtıma Hatun bt. Abdülkadir muvâcehesinde mezbûre Fâtıma’nın zevci İbrahim nâm kimesne işbu câmi‘-i şerîf-i mezkûrun mihrâbına muttasıl ve ziyâ ahzı için mu‘ad ve terk olunan arsa üzerine bundan akdem hilâf-ı şart-ı vâkıf bir matbâh binâ ve ihdâs eyleyip câmi‘-i şerîf-i mezbûrun ziyâsını kat‘ ve zarâr-ı beyyini var iken menzil-i mezkûru zevcesi mezbûre Fâtıma’ya mezkûr matbâh ile verip hâlâ mezbûre Fâtıma’nın tasarrufunda olmağla ve mezkûr matbâhın hedmi arsa-i mezkûra muzır olmamağla hedm eylesin deyü ba‘de’d-da‘vâ ve’l-mu‘âyene ve’l-ikrâr vekîl-i merkūm kendi malından masârıf-ı lâzımesini vermeğe ta‘ahhüd eyledikde mezbûre Fâtıma dahi hedme mübâşeret eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 25 min-Cumâdelâhire sene 1180. Temme bi’l-fevzi ve’l-felâh bi-avnillâhi’l-fettâh Muhammeden sümme hamden sümme hamden (Mühür)