İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 101 Hüküm no: 48 Orijinal metin no: [24-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Unkapanı haricinde Tekirdağı İskelesi’nde yanan Yahudihane ve mahzenlerinin listesi ve temessük tarihleri Kapan hâricinde muhterik olan Yahûdîhaneler ve mahzenlerin temessükâtı târîhleri Kapan-ı dakīk tüccârı imzâsıyla mübârek rikâb-ı müstetâba verilen arzuhâl hâmişinde sâdır olan fermân-ı âlîlerine imtisâlen kapan-ı mezbûr hâricinde Tekfurdağı İskelesi’nde vâki‘ bundan akdem muhterik olan Yahûdîhâne ve tahtında olan mahzenlerin Haremeyn-i muhteremeyn müfettişi müderrisîn-i kirâmdan Ahmed Necib Efendi dâ‘îleri tarafından mürsel Mehmed Samih Efendi ve devletlü inâyetlü Sadrıâzam hazretleri nezâret-i aliyyelerinde olan evkāf müfettişi müderrisîn-i kirâmdan Ali Efendi ve semâhatlü inâyetlü veliyyü’n-ni‘am Şeyhülislâm-ı -sellemehü’s-selâm- hazretleri nezâret-i aliyyelerinde olan evkāf müfettişi mevâlî-i izâmdan fazîletlü Muradzâde es-Seyyid Ahmed Efendi dâ‘iyânede senedât ve temessükâtlarına nazar ve vukū‘u üzere tahrîr olunan defterdir ki ber-vech-i âtî târîhleri tasrîhiyle zikr olunur. Fî 20 Şevvâl sene 1179. Der-nezâret-i Ağa-yı Bâbüssa‘âde Yahûdîhâne an vakf-ı Cafer Ağa der-uhde-i Yağcı el-Hâc Hüseyin, tahtında Çürükçü mahzeni 4 Derûn-ı temessük târîhi 1164 Der-nezâret-i Ağa-yı Bâbüssa‘âde Yahûdîhâne an-vakf-ı Cafer Ağa der-uhde-i Sermahfilzâde zevcesi Rukıye Hatun, tahtında Çürükçü mahzeni 1 Derûn-ı temessük târîhi 1159 Der-nezâret-i Ağa-yı Dârüssa‘âde Uncu odaları an-vakf-ı Cafer Ağa der-uhde-i Keresteci Gümrükçü Mustafa Ağa ve şerîkleri Ümmügülsüm ve Saliha Derûn-ı temessük târîhi 1166 Der-nezâret-i Ağa-yı Bâbüssa‘âde Yahûdîhâne an-vakf-ı Cafer Ağa der-uhde-i celeb Anderya zimmî ve Mosi v. Menahim Yahûdî tahtında Çürükçü mahzeni 2 Temessükü târîhi atik görülmüşdür. 1177 Der-nezâret-i Ağa-yı Dârüssa‘âde Yahûdîhâne an-Haseki Sultân der-uhde-i Tuzcu Hâfız el-Hâc Mehmed tahtında Çürükçü dükkânı Temessükü târîhi atik temessükü bulunmuşdur. 1177 Der-nezâret-i Bâbüssa‘âde Yahûdîhâne an-Vakf-ı Haseki Sultân der-uhde-i Emrullah ve Şerîkleri Mosi ve İşva tahtında Çürükçü mahzeni Derûn-ı temessükü târîhi 1166. Der-nezâret-i Ağa-yı Bâbüssa‘âde Yahûdîhâne an vakf-ı Haseki Sultân der-uhde-i Keresteci Arab Kalfa oğlu Pavlo zimmî tahtında Çürükçü mahzeni Derûn-ı temessükü 1130 Derûn-ı temessükde Yahûdî kaydı olmayıp lâkin zahrında elli beş târîhiyle kayd-ı ferâğda mezkûrdur Der-nezâret-i Ağa’yı Bâbüssa‘âde Yahûdîhâne an-Vakf-ı Haseki Sultân der-uhde-i Arab oğlu zevcesi Meryem tahtında Çürükçü mahzeni 1 Temessükü târîhi 1157, Temessükünde Yahûdîhâne kaydı olmayıp ancak mahzen kaydolunmuşdur. Der-nezâret-i Bâbüssa‘âde Yahûdîhâne an-Vakf-ı Haseki Sultân der-uhde-i Attâr Ömer ve şerîkleri Emine ve Saliha ve Rabia, tahtında dükkânı Derûn-ı temessük 1161, Yahûdîhâne kaydı olmayıp ancak mahzen kaydolunmuşdur. Der-nezâret-i Ağa-yı Babüssa‘ade Yahûdîhâne Vakf-ı Haseki Sultân der-uhde-i Masraf-ı şehriyârî-i sâbık Abdurrahman Bey zevcesi Saraylı Hatun tahtında zeytinci mahzeni 1 Sâhibesi temessükünü irâet etmemişdir. Der-nezâret-i Ağa-yı Bâbüssa‘âde Yahûdîhâne an Vakf-ı Haseki Sultân der-uhde-i Ümmügülsüm Hatun ve şerîkleri Menahim Yahûdî tahtında berber dükkânı Derûn-ı temessükü târîhi 1167 Der-nezâret-i Kadı-yı İslambol Yahûdîhâne an Vakf-ı Şerîfzâde Mehmed Efendi der-uhde-i Arslan Yahûdî tahtında mahzen yokdur. Derûn-ı temessükü târîhi 1139 Der-nezâret-i Kādı-yı İslambol Yahûdîhâne an-Vakf-ı Şerîfezâde Mehmed Efendi der-uhde-i el-Hâc İbrahim ve Emine ve Hadîce tahtında zeytinci mahzeni 1 Derûn-ı temessükü târîhi 1145 Der-nezâret-i hazret-i Sadrıâzamî Yahûdîhâne an-Vakf-ı Rüstem Paşa der-uhde-i Hatvânîzâde Ahmed Efendi, tahtında mahzen yokdur. Derûn-ı temessükü târîhi 1138 Der-nezâret-i hazret-i Sadrıâzamî Yahûdîhâne an Âişe Sultân der uhde-i Beylikçi Mehmed Efendi ve şerîkler İsak ve Davit ve Yova ve Avram ve diğer İsak Dikici ve zıbıncı ve dikici tahtında dükkân Derûn-ı temessükü târîhi 1155 Der-nezâret-i hazret-i veliyyü’n-ni‘amî Yahûdîhâne an-Vakf-ı Ahi Çelebi der-uhde-i Çukacı Mosi tahtında zeytinci mahzeni Derûn-ı temessükü târîhi 1092 Derûn-ı temessükde Yahûdîhâne kaydı olmayıp lâkin hâmişinde elli altı senesinde olan sandığında mezkûrdur Der-nezâret-i hazret-i veliyyü’n-ni‘amî Yahûdîhâne an vakf-ı Ahi Çelebi der-uhde-i Yuda Yahûdî tahtında bakkāl dükkânı Derûn-ı temessükü târîhi, 1131 Derûn-ı temessükde Yahûdîhâne kaydı olmayıp lâkin hâmişinde elli altı senesinde olan kayd-ı ferâğında mezkûrdur Der-nezâret-i hazret-i Sadrıâzam Yahûdîhâne an-vakf-ı Rüstem Paşa der-uhde-i Emine Hatun tahtında zeytinci mahzeni 2 Derûn-ı temessükü târîhi 1142 Der-nezâret-i Haremeyn Yahûdîhâne an-vakf-ı Ayasofya der-uhde-i Şabcı İsak ve David ve Yuda ve Avram ve diğer İsak tahtında berber ve dikici dükkânı ve mahzen 3 Derûn-ı temessükü târîhi 1113 [25] Vech-i meşrûh üzere temessükâta ba‘de’n-nazar müstecirûn-ı mezbûrûnun müdde‘îleri olan mezkûr mahzenlerin kirâcıları hâzır olmamağla mûmâ-ileyhim müfettiş efendiler dâ‘îleri ve taraf-ı dâ‘îlerinden dahi mürsel es-Seyyid Halil Efendi ve mi‘mâr ağa tarafından Mehmed Emin Halîfe mahâll-i mezkûra varıp zikr olunan Yahûdîhâne ve mahzen ve dükkânların mahâllerini ba‘de’l-mu‘âyene minvâl-i meşrûh üzere kable’l-harîk mevcûd iken muhterik olup ve kemâ-fi’l-evvel binâ olunduğu sûretde kimesneye zarârı yokdur deyü mehâzîn-i merkūme müstecirlerinden hâzır olmayan iki nefer kirâcılardan mâ‘adâ kırk neferden mütecâviz mazbûtü’l-esâmi kimesneler ihbâr ve zarârı olduğunu haber verir kimesne bulunmayıp arzuhâli veren dahi kim olduğu ma‘lûmumuz değildir ve arzuhâlden dahi haberimiz yokdur deyü gerek merkūm kirâcılar ve gerek ol mahâlde olan sâir Müslimîn takrîr eylediklerini mahâllinde ketb ü tahrîr ve gelip inhâ eylemeleriyle zikr olunan Yahûdîhâneler temessükâtlarından üç kıt‘ası görülmemekle ba‘de’r-rü’ye atik ve cedîd târîhleri tasrîhiyle defter tekrâr arz olunacağı çend rûz mukaddem huzûr-ı âlîlerine i‘lâm olunmuş idi. Hâlâ iki kıt‘ası rü’yet ve bir kıt‘ası sâhibesi irâet etmemekle ol vechile derc olunup tekrâr huzûr-ı âlîlerine arz olunduğu ma‘lûm-ı devletleri buyruldukda emr ü fermân hazret-i men-lehü’l-emrindir.