İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 104 Hüküm no: 49 Orijinal metin no: [25-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ali’nin evine dönmesini istediği eşi Habibe’yi vekaletle boşadığının tescili Muhâla‘aya tevkîlini isbât Ma‘rûz, Arzuhâl eden Çukadâr es-Seyyid Hüseyin b. Ali Çarşamba günü arz odasında huzûr-ı âlîde ma‘kūd meclis-i şer‘-i münîrde arzuhâlinde mezkûr zevce-i muhâlı‘ası Habibe bt. Abdullah mahzarında mezbûre Habibe elli guruş mehr-i müeccel tesmiyesiyle zevce-i medhûlün-bihâm iken hâzır bi’l-meclis Ahmed nâm kimesne benim için zevcesi mezbûreye muhâla‘aya beni tarafından tevkîl etdi deyü ben tevkîl etmeksizin fuzûlî mezbûre ile Bâb Mahkemesi’ne varıp muhâla‘a olup hüccet etdirmiş idi. Lâkin ben hul‘u kabûl etmemek ile mezbûre Habibe’ye benim ile mu‘âmele-i zevciyete tenbîh olunsun deyü da‘vâ, mezbûre Habibe cevâbında müdde‘î-i mezbûr es-Seyyid Hüseyin işbu Ramazan-ı şerîfin on birinci gecesi mezbûr Ahmed’i Nişâncı’da vâki‘ menzilinde mehrim ve nafaka-i iddet-i ma‘lûmem üzerlerine benim ile hul‘ ve ibrâya huzûr-ı Müslimînde tarafından tevkîl, ol dahi vekâleti kabûl ve ertesi gün mahkeme-i mezkûrede benim ile vech-i meşrûh üzere muhâla‘a olup hüccet-i mezkûreyi vermekle ben mezbûr es-Seyyid Hüseyin’den bu vechile mübâyene olmuş idim deyü ba‘de’d-def‘ ve’l-inkâr mezbûre Habibe ber-vech-i muharrer mezbûr es-Seyyid Hüseyin’in tevkîline Haseki Medresesi’nde sâkin Molla Hüseyin b. Salih ve Nişâncı mahâllesi Bekçisi es-Seyyid Halil b. Mehmed nâm kimesneleri ikāme, onlar dahi edâ-yı şehâdet-i şer‘iyye edip ba‘de’l-ta‘dîl tezkiyeleri için mahâllelerine tezkiye nâibimiz dâ‘îleri irsâl, ol dahi mezbûrânı mazbûtü’l-esâmi Müslimînden suâl ve tezkiye edip udûlden olduklarını ihbâr etdikleri ihbâr ve takrîr ve inhâ etmekle şehâdetleri şer‘an makbûle olmağın mûcibiyle mezbûr es-Seyyid Hüseyin husûs-ı mezkûr için bi-gayrı vech-i şer‘î mu‘ârazadan men‘ olunduğu mübâşiri merkūm çavuş kulları iltimâsıyla huzûr-ı âlîlerine i‘lâm olundu. Fî 14 min-Zilka‘de sene [11]79.