İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 104 Hüküm no: 50 Orijinal metin no: [25-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Mehmed’in boşandığı eşi aleyhindeki mehir ve eşya davasının reddedilmesi Bursa mukāta‘acısı Mehmed Efendi zevce yedimde bir şey kalmadı deyü kasem Ma‘rûz, Mahmiye-i İstanbul’da Ma‘cûncu’da sâkine arzuhâl eden Şerîfe Saime nâm hatun tarafından husûs-ı âti’z-zikrde vekîli olduğu zâtını ârifân Câbî Molla Ahmed b. Mehmed ve Attâr Ahmed b. İbrahim nâm kimesneler şehâdetleriyle sâbit olan babası Mehmed Ağa b. Ömer Çarşamba günü arz odasında huzûr-ı âlîde ma‘kūd meclis-i şer‘-i şerîfde müvekkile-i mezbûrenin zevc-i dâhili olup derûn-ı arzuhâlde mezkûr Hâcegân-ı Dîvân-ı hümâyûn’dan Bursa Mukāta‘acısı Şehrî Mehmed Efendi b. Ebubekir mahzarında müvekkilem mezbûre Saime beş yüz guruş mehr-i müeccel tesmiyesiyle mezbûr Mehmed Efendi’nin zevce-i medhûlün-bihâsı iken işbu Şevvâl-i şerîfin dokuzuncu günü Kalenderhâne’de vâki‘ sâkin oldukları menzilde irâdetin elinde olsun deyü talâk-ı bâyin ile tatlîk etmekle mehr-i mezkûrunu ve firâşından hâsıl takrîben yedi aylık hamli olmağla vaz‘la iddeti münkaziye olunca nafakasını bi’l-vekâle taleb ederim deyü da‘vâ, mezbûr Mehmed Efendi cevâbında müvekkile-i mezbûre ol mikdâr mehr-i müeccel ile zevce-i medhûlün-bihâsı olup vech-i muharrer üzere tatlîkini ve hamlini ikrâr, lâkin işbu yetmiş dokuz senesi [26] Ramazani’l-mübârek’in yirmi birinci günü zikr olunan menzilimde zimmetimde olan mehr-i mezkûrunu bana hibe eyledikde ben dahi ittihâb ve kabûl ve ivazın ona bir altın sâ‘at ve bir elmaslı çiçek verdiğimde ol dahi kabz u kabûl ve mehr-i mezkûruna müte‘allıka da‘vâdan benim zimmetimi ibrâ etmiş idi deyü takrîrine mutâbık bir kıt‘a hüccet-i şer‘iyye ibrâzıyla ba‘de’d-def‘ ve’l-inkâr mezbûr Mehmed Efendi mazmûn-ı hüccet-i mezkûreye mârrü’z-zikr Kalenderhâne mahâllesinde sâkin Deryâ Kalemi sipâhîlerinden Ömer b. Hasan ve yine mahâlle-i mezbûrede medresede sâkin Molla Mehmed b. İbrahim nâm kimesneler ikāme, onlar dahi edâ-yı şehâdet-i şer‘iyye edip ba‘de’t-ta‘dîl tezkiye olundukda udûlden oldukları mahâlle-i mezbûreden ba‘de’l-istihbâr ihbâr olunmağla şehâdetleri şer‘an makbûle olmağın mûcebiyle mehr-i mezkûr ile vekîl-i mezbûr bi-gayrı vechin mu‘ârazadan ba‘de’l-men‘ nafaka-i mezkûre için bi’t-terâzî altmış guruşa beynleri tevfîk olundukdan sonra vekîl-i mezbûreyi ba‘de’t-tatlîk menzil-i mezkûrdan kendi menziline nakil esnâsında dolap içinde bir karsak kürk ve ikisi dikme ve biri üstûfe üç boğça ve iki keremsûd ve üç şâlî beş anteri ve iki kat gömlek ve don ve on oya ve yirmi yağlık ve sekiz yemenî ve beş destmâl ve bir hamam rahtı kalmağla mezbûr ahz ve hâlâ yedindedir deyü tasaddî eylediği da‘vâsını isbâtdan acz birle istihlâf etmeğin mezbûr Mehmed Efendi tahlîf olunduğu tescîl ve mübâşiri Mehmed Çavuş kulları iltimâsıyla huzûr-ı âlîlerine i‘lâm olundu. Fî 14 min-Zilka‘de sene 1179.