İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 105 Hüküm no: 51 Orijinal metin no: [26-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemalpaşa mahallesi müezzini Abdullah’ın mahalleden çıkarılması Kemâlpaşa müezzinini mahâlleden ihrâc Ma‘rûz, Mahmiye-i İstanbul’da Kırkdört kapısında Kemâlpaşa mahâllesi imamı el-Hâc Osman Efendi ve Tâcirler Kethüdâsı Mustafa ve mütevellî el-Hâc Mehmed ve Peştemâlci Mehmed Çelebi ve Kolancı Süleyman ve Usta Mehmed ve Na‘alband Mustafa ve Na‘alband İbrahim ve Hakkâk Molla Mustafa ve Kasım Ağa ve el-Hâc Salih ve Kayyûm Molla Halil ve Yaycı İbrahim ve Kırkdört nâzırları Mehmed Odabaşı ve Mehmed Beşe ve Yorgancı İsmail Ağa ve Ekmekçibaşı Hüseyin meclis-i şer‘-i şerîfe ihzâr eyledikleri mahâlle-i mezbûre müezzini Abdullah b. Abdullah mahzarında mezbûr Abdullah kendi hâlinde olmayıp mahâlle-i mezbûrede alâkası olmadığı umûra karışıp zevcesiyle ma‘an mahâlle-i mezbûreye mechûletü’l-ahvâl avradlar iskân ve hattâ birkaç gün mukaddem olan harîk mezbûrânın vech-i meşrûh üzere iskân eylediği Zeliha nâm avradın menzilinden zuhûr edip bir vechile emniyetimiz yokdur deyü muvâcehesinde sû-i hâlini ihbâr ve mahâlleden ihrâc olunmasını iltimâs etmeleriyle ol dahi rızâsıyla müezzinliğini âhara kasr-ı yed ve mahâlleden çıkmağa ta‘ahhüd eylediği ahâlî-i mezbûrun iltimâslarıyla huzûr-ı âlîlerine i‘lâm olundu. Fî 14 Zilka‘de sene [11]79.