İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 106 Hüküm no: 52 Orijinal metin no: [26-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naili Abdullah Paşa’nın yaptırdığı Çeşme’nin su havzasına ahır ve tuvalet yapan Nalband Mehmed’in bunları kaldırması Keşf der-kurb-ı Davudpaşa iskelesi Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşf nâibimiz es-Seyyid Halil Efendi dâ‘îleri ve hâssa mi‘mârlarından Hasan ve Ahmed halîfeler ve Suyolculardan İbrahim Usta ve sâir ümenâ-yı şer‘le mahmiye-i İslambol’da Davudpaşa kapısı dâhilinde ve ittisâlinde vâki‘ içinde bargir ahırı olan na‘alband dükkânına varıp huzûr-ı Müslimînde akdeylediği meclis-i şer‘-i şerîf-i enverde ashâb-ı hayrâtdan sadr-ı esbak merhûm Nâilî Abdullah Paşa’nın hâric-i sûrda binâ eylediği câmi‘-i şerîf ve çeşmesinin evlâdiyet ve meşrûtiyet üzere mütevellîyesi olan Akile Hanım tarafından kāimmakāmı eş-Şeyh Hasan Efendi b. Mustafa meclis-i ma‘kūd-ı mezkûrda müsteciri Mehmed b. el-Hâc Hasan mahzarında dükkân-ı merkūmun ittisâlinde olup mezkûr çeşmenin hazînesi içine binâ olunan Hisar kulesini müstecir-i merkūm ahır ittihâzıyla [27] bargirler bağlayıp hâsıl olan revs ve çirkâbından ve mezkûr çeşmenin mecrâsına bir zirâ‘ mikdârı karîb olan mahâlle dahi iki aded kenîf ihdâs olunmak sebebiyle müstecir-i merkūm telvîsden hâlî olmayıp rehâvet-i arzdan mâ-i lezîzin levn ve ta‘âm ve râyihâsında âsâr müşâhede ve zâhir olmağın men‘ olunsun dedikde cerîdede mazbûtü’l-esâmi udûlden otuz nefer Müslimîn dahi gerek kule-i merkūmede bargir bağlayıp ahır tarafından isti‘mâl olunduğunun hudûsunu ve gerek zikr olunan iki bâb kenîflerin hudûsunu ve gerek mahâlleyn-i mezkûreyni müstecir-i merkūm telvîs edip mâ-i mezkûrda tesîri müşâhede ve zâhir olduğunu muvâcehesinde alâ-tarîkı’ş-şehâde haber verip müstecir-i merkūm dahi telvîsini ikrâr u i‘tirâf etmeğin ikrârı mûcebiyle fî-mâ-ba‘d mahâlleyn-i mezkûreyni telvîs ile mâ-i mezbûrun ta‘mı tagayyür etmeyip tathîr ve tanzîf eylemek üzere tenbîh eylediğini mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm olundu. Fî 12 min-Şevvâl sene 1179.