İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 107 Hüküm no: 53 Orijinal metin no: [27-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa kasaplarının Kasımpaşa debbağları aleyhindeki deri bedeli davasının reddedilmesi Yedikule kasabları debbâğlardan beher deriye birer akçe ziyâde taleb Ma‘rûz, Sâdır olan fermân-ı âlîlerine imtisâlen semâhatlü inâyetlü Şeyhülislâm-ı -sellemehü’s-selâm- hazretleri nezâretlerinde olan evkāf müfettişi mevâlî-i izâmdan Muradzâde fazîletlü es-Seyyid Ahmed Efendi ile dâ‘îhânede akdolunan meclis-i şer‘-i hatîrde Kasımpaşa kasaplarından arzuhâl eden İsmail ve es-Seyyid Mehmed ve Ahmed Kapudan ve Küçük Mehmed ve el-Hâc Ömer ve Molla Mehmed ve es-Seyyid Osman ve el-Hâc Seyfi ve yine Kasımpaşa debbâğlarından Ahîbabaları Ahmed Çelebi ve Molla Mehmed ve el-Hâc Hüseyin ve el-Hâc Osman ve Molla Ahmed ve Molla İbrahim ve Molla Mustafa ve İsmail ve es-Seyyid Yusuf ve Peh[li]van? Yusuf ve el-Hâc Ahmed ve Veli Usta ve diğer Mustafa ve Molla Halil ve diğer Halil ve Mustafa Usta ve diğer İsmail ve diğer Halil mahzarlarında ez-kadîm dükkânlarımızda zebh eylediğimiz koyunların cülûdunu mezbûrûn debbâğlar bize Yedikule’de mezbûh ağnâmın derilerinin bahasından bir akçe ziyâde veregelip hattâ yetmiş iki senesinde bir akçe ziyâdeyi da‘vâya tasaddî ve ol târîhe gelince beynimizde cârî ahz u i‘tâya müte‘allıka da‘vâdan birbirimiz beyninde mübâree vâki‘ olup ba‘dehû işbu yetmiş dokuz senesi Rebî‘ülevveli’nin dokuzuncu günü ziyâde-i mezkûreyi tekrâr da‘vâya tasaddî eylediğimizde onlar dahi kendilere bey‘ eylediğimiz koyunların yapağıları yolunmamak üzere iştirâ ve bu vechile fî-mâ-ba‘d birer akçe ziyâdeyi vermeğe ta‘ahhüd etmekle ta‘ahhüdleri i‘lâm ve mûcebince fermân-ı âlî sâdır olup lâkin yetmiş iki senesinde şehr-i mezkûrun dokuzuncu gününe gelince biz bâ-defter üç yük on yedi bin yüz seksen beş ve işbu hâzırân bi’l-meclis Giridî Mehmed ve şerîki diğer Mehmed dahi yetmiş dört bin iki yüz elli deri verip ta‘ahhüd-i mezkûra binâen zikr olunan derilerin dahi bahasından ziyâde birer akçeyi taleb eyleriz deyü da‘vâya tasaddî edip zikr olunan debbâğlar ber-vech-i muharrer birer akçe ziyâde verdiklerini bi’l-külliye inkâr eylediklerinden mâ‘adâ mezbûr kasablar ol mikdâr koyunları ba‘de’z-zebh ve’s-selh debbâğlara birer akçe ziyâdeye bey‘ ü şirâ ve kabûllerini vech-i şer‘î üzere bir vechile tashîh ve beyana kādir olamadıklarından mâ‘adâ mezbûr debbâğlar yedlerinde olup ibrâz eyledikleri i‘lâm mantûkunca merkūm kasablar husûs-ı mezkûr için şehr-i mezkûrun yirmi ikinci günü mezbûr debbâğlar ile murâfa‘a ve debbâğların her birine bir mikdâr deri teslîm ve her bir deri için kaç akçe semen tesmiye eylediklerini ta‘yîn ve beyan edememekle da‘vâları şer‘an mesmû‘a olmayıp bî-vech mu‘ârazadan men‘ olunmalarıyla kemâ-fi’l-evvel mu‘ârazadan men‘ olundukları tescîl olunup İsa Çavuş kulları iltimâsıyla huzûr-ı âlîlerine i‘lâm olundu. Fî 14 min-Zilka‘de sene 1179