İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 108 Hüküm no: 54 Orijinal metin no: [28-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük yaşta evlendirilen Hafize’ye evlilik yaşına gelinceye kadar kocası Mustafa tarafından dokunulmaması ve kocasından ayrı bir evde ikâmet etmesi Zevcesi mehzûle olup mutîka olunca ta‘arruz eylemeye Ma‘rûz, Arzuhâl eden Ümmühani takrîben on yaşında olan Hafize bt. Süleyman nâm kızını babası mezbûr Süleyman’ın izin ve rızâsıyla Zeyrekbaşı’nda Demirhan mahâllesinde sâkin ve arzuhâlinde mezkûr Çömlekçi es-Seyyid Mustafa’ya üç bin akçe mehir tesmiyesiyle tezvîc ve inkâh eylediği mezbûre Ümmühani ve babası mezbûr Süleyman’ın ikrârlarıyla zâhir ve müte‘ayyin oldukdan sonra mezbûre Ümmühani meclis-i şer‘-i şerîfde mezbûr es-Seyyid Mustafa mahzarında kızım mezbûre maslahat-ı ricâle sâliha olmadan menzilimden cebren ahz ve menziline götürüp zifâf murâd edip lâkin sagīre-i mezbûre mehzûle olup mutîka olmamağla ifzâ eyledi deyü teşekkî etmeğin sagīre-i mezbûre meclis-i şer‘-i şerîfe ihzâr ve kābileye irâet ve müteessir olduğu müte‘ayyen ve mutîka olunca şer‘an tevkīf iktizâ edip lâkin anası mezbûre zât-ı zevc olmayıp me’mûne dahi olmadığından mâ‘adâ anasından müstağnîye olup şer‘an babası imsâka kādir olmağla babası mezbûr re’yiyle mutîka olunca zevci mezbûr ta‘arruz etmemek şartıyla zevci mezbûrun karındaşı zî-iyâl olup me’mûn olduğu mahâlle-i mezbûre ahâlîsinden imam vekîli İbrahim Efendi ve Çörekçi Mehmed ve Müezzin Ali Efendi ve Hasan Çelebi ve Çömlekçiler kethüdâsı İbrahim ve Çömlekçi Osman ihbâr ve tekeffülleriyle müte‘ayyen olan Çömlekçi es-Seyyid Hüseyin’in menzilinde iskân ve anası mezbûre vech-i şer‘î üzere haftada bir def‘a gelip rü’yet etmek üzere beynleri tevfîk olunduğu bi’l-iltimâs huzûr-ı âlîlerine i‘lâm olundu. Fî 18 Zilka‘de sene 1179.