İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 108 Hüküm no: 55 Orijinal metin no: [28-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Serkiz’in eniştesi Asvador aleyhindeki alacak davasında anlaşma sağlanması On beş vakiye sîm-i hâlis semeninden 600 sulh Ma‘rûz, Arzuhâl eden Avanis v. Serkiz Çarşamba günü arz odasında huzûr-ı âlîde ma‘kūd meclis-i şer‘-i şerîfde arzuhâlinde mezkûr eniştesi Asvador v. Mardıros muvâcehesinde merkūm Asvador yedine Samatya’da kendi menzilinde malımdan otuz üç zarf ve mâ‘adâsı kuşak her dirhemi otuz üç akçeye on beş vakiye sîm-i hâlis îdâ‘ ve teslîm ve hattâ ol mikdâr sîm-i hâlisimi yedimden ahz u kabz ve istihlâk eylediğini ikrâr ve işhâd dahi etmekle Eyüb Mahkemesi sicillinden hâmiş-i arzuhâle derkenâr olunan i‘lâm sûreti mantûkunca yetmiş sekiz senesi Saferi’nin on altıncı günü mevâlî-i izâmdan Eyüb kādısı olan es-Seyyid İbrahim Efendi huzûrunda murâfa‘a-i şer‘-i şerîf olup ben merkūm Asvador’un ikrâr-ı meşrûhunu vech-i şer‘î üzere şuhûd ile isbât ve hilâf cinsinden şer‘an lâzım gelen kıymet-i mezkûresinin edâsına hükm-i şer‘î lâhık olmuş iken merkūm Asvador edâsında ta‘annüt ve temerrüd ve mümâtale eylediğinden mâ‘adâ benim için bu da‘vân da müzevverdir deyü ihbâr ve beni küreğe vaz‘ etdirdip ba‘dehû ıtlâk olunduğumda merkūme şer‘an lâzım gelen hakkımı ver deyü mutâlebe eylediğimde mukaddemâ olan kürek kaydını ihrâc ve irtişâ ile tekrâr beni küreğe vaz‘ etdirdip hâlâ yedinde olan kürek defteri derkenârı mantûkunca fî-mâ-ba‘d ol misillü töhmet ile ahz olunur ise müebbeden küreğe vaz‘ olunmak şartıyla deyü şerh verdirip hakkımı ibtâl kaydında dahi olmağla muktezâ-yı şer‘-i şerîf üzere isbât eylediğim hakkım ihkāk olunmak matlûbumdur deyü da‘vâ ve gıbbe’l-istintâk merkūm Asvador cevâbında müdde‘î-i merkūmun ber-vech-i muharrer kendinden on beş vakiye gümüş da‘vâsın ve ba‘dehû i‘lâm-ı mezkûr üzere ikrârını isbât eylediğini ikrâr u i‘tirâf edip lâkin bi’t-taharrî istitlâ‘-ı hakīkat-i hâl için esnâfından tefahhusa havâle olunmuş idi. El-hâletü hâzihi müdde‘î-i merkūm Avanis hasmı merkūm Asvador ile hâmis günü dâ‘îhânede meclis-i şer‘-i şerîfe gelip bâ-vesâtet-i muslihûn merkūm Asvador ile da‘vâ-i mezkûremden altı yüz guruş üzerine sulh olup zikr olunan on beş vakiye gümüşe müte‘allıka da‘vâdan merkūm Asvador’un zimmetini ibrâ edip lâkin merkūm Asvador bedel-i sulh [olan] altı yüz guruşu yevm-i mezbûrdan beş güne dek edâsına istîcâl etmeğin ben dahi tecîl etdim dediğini merkūm Asvador tasdîk ve ecel-i merkūm tamâmında bedel-i sulhları olan altı yüz guruşu edâya ta‘ahhüd ve kat‘-ı nizâ‘ eyledikleri huzûr-ı âlîlerine i‘lâm olundu. Fî 14 min-Zilka‘de sene 1179.