İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 109 Hüküm no: 56 Orijinal metin no: [29-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırkçeşme suyunun çoğaltılması amacıyla kaynağına yapılacak bend için taş nakliye ücretinin tesbiti Bend-i cedîde Fil Köprüsü’nden taş nakliyesine vaz‘ olunan fiât Ma‘rûz, Âsâr-ı azîme ve celîle ve hayrât-ı câriye-i cezîle-i hazret-i cihandârîden olmak üzere mahmiye-i İstanbul’a câriye miyâh-ı azbeden Kırkçeşme suyu ta‘bîr olunan mâ-i lezîzin tevfîr ve teksîri irâde-i hayriyesiyle menba‘ına karîb İvazderesi nâm mahâlde binâsına mübâşeret olunan bendin levâzım-ı binâsından olup hâlâ Filköprüsü’nde i‘dâd ve ihzâr kılınan ahcârın nakli için İslambol’da mevcûd bulunan arabacıların nakliyeleri fiâtı kırk iki târîhinde binâ olunan sed, taş nakleden arabalara verilen otuz ikişer akçe yevmiyeye kıyâs ile olmayıp ecr-i misilleri mikdârı fîleri rızâlarıyla vaz‘ ve pazarları eyyâm-ı adâlet-irtisâm-ı hazret-i hüdâvendigārîde ma‘rifet-i şer‘le kat‘ olunmak münâsib görülmekle sa‘âdetlü defterdâr efendi telhîsiyle bu dâ‘îlerine ve haslar nâibi efendi dâ‘îlerine hitâben ber-vech-i meşrûh husûl-pezîr olması için emr-i âlî sâdır olmağla imtisâlen-leh izzetlü yeniçeri ağası ma‘rifetiyle arabacılar kethüdâsı ve İstanbul’da mevcûd müte‘addid araba sâhibi olan arabacılardan cerîdede isimleri mazbût yirmi iki nefer kimesne meclis-i şer‘-i şerîfe ihzâr ve binâ emîni sa‘âdetlü çavuşbaşı ağa tarafından vekîl-i müseccelleri Ömer Ağa hâzır olduğu hâlde mazmûn-ı emr-i âlî tefhîm ve Edirne ve âhar mahâllere ol makūle nakl-i ahmâl eden arabaların kirâlarına kıyâs ile ecr-i misilleri ta‘yîn ve kendileri ilzâm ve tefhîm olundukda her zirâ‘ına ellişer akçe ücret-i nakliye verilmesi niyâzında olmalarıyla ashâb-ı vukūfdan dahi istihbâr olundukda bu sûretde tarafeyn mağbûn olmayacağı mütehakkık olmağla mezbûr arabacılar sâlifü’l-beyan Fil Köprüsü’nden bend-i cedîd mahâlli olan İvazderesi’ne her zirâ‘ını ellişer akçe ücret ile ahcâr-ı mezkûreyi arabalarına tahmîl ve nakle ta‘ahhüdleri tescîl ve işbu Zilka‘de-i şerîfenin yirminci erba‘a günü şürû‘ eyleyecekleri huzûr-ı âlîlerine i‘lâm olundu. Fî 19 min-Zilka‘de sene 1179.