İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 110 Hüküm no: 57 Orijinal metin no: [29-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapan dışında yanmış olan Yahudihane ve altlarındaki mahzenlerin aslına uygun olarak inşası Kapanın hâricinde muhterik olan Yahûdîhâne ve tahtında olan mahzenlerin Arzuhâlde mezkûr Yahûdîhâneler ve tahtında olan mahzenler husûsu için mübârek rikâb-ı müstetâba verilen arzuhâl hâmişinde vârid olan fermân-ı âlîye imtisâlen dâ‘îhânede Haremeyn-i muhteremeyn müfettişi müderrisîn-i kirâmdan Ahmed Necib Efendi dâ‘îleri tarafından mürsel Mehmed Samih Efendi devletlü inâyetlü sadrıâzam hazretleri nezâret-i aliyyelerinde olan evkāf müfettişi müderrisîn-i kirâmdan Ali Efendi ve semâhatlü inâyetlü veliyyü’n-ni‘am Şeyhülislâm hazretleri nezâret-i aliyyelerinde olan evkāf müfettişi mevâlî-i izâmdan fazîletlü Muradzâde es-Seyyid Ahmed Efendi dâ‘îleriyle zikr olunan Yahûdîhânelerin mütevellîleri ve müstecirleri yedlerinde olan senedât ve temessükâta nazar ve vukū‘u üzere târîhleri tasrîhiyle tahrîr ve zabt olunup müstecirûn-ı mezbûrûnun müdde‘îleri olan mezkûr mahzenlerin kirâcıları hâzır olmamağla mûmâ-ileyhim müfettiş efendiler ve bu dâ‘îleri tarafından dahi irsâl olunan es-Seyyid Halil Efendi ve mi‘mâr ağa tarafından Mehmed Emin Halîfe mahâll-i mezkûre varıp zikr olunan Yahûdîhâne ve mahzen ve dükkânların mahâllerini ba‘de’l-mu‘âyene kable’l-harîk tahrîr olduğu üzere mevcûd olup kemâ-fi’l-evvel binâ olunduğu sûretde kimesneye zarârı yokdur deyü mehâzîn-i merkūme müstecirlerinden hâzır olmayan iki nefer kirâcılardan mâ‘adâ kırk neferden mütecâviz mazbutü’l-esâmi kimesneler ihbâr ve zarârı olduğunu haber verir kimesne bulunmayıp arzuhâli veren dahi kim olduğu ma‘lûmumuz değildir ve arzuhâlden dahi haberimiz yokdur deyü gerek merkūm kirâcılar ve gerek ol mahâlde olan sâir Müslimîn takrîr eylediklerini mahâllinde ketb ü tahrîr ve inhâ etmeleriyle zikr olunan Yahûdîhânelerin birinin sâhibesi irâet etmemekle ma‘adâsının atik ve cedîd târîhleriyle isimleri defter olunup işbu Şevvâl-i şerîfin yirminci günü târîhinde i‘lâmıyla atebe-i aliyyelerine ref‘ ve irsâl olunduğu sicill-i mahfûzda mazbût ve mukayyeddir. Fî 15 Zilka‘de sene 1179. [30] Bâ-sah, İstanbul kādısı fazîletlü efendi ve Haremeyn müfettişi ve evkāf müfettişleri efendiler diğer arzuhâl üzerine olan i‘lâmınız mûcebince vaz‘-ı kadîmleri üzere ebniye-i mezbûrenin mi‘mâr ağa ma‘rifetiyle binâsına bî-vech-i şer‘î mümâna‘at etdirilmeye deyü