İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 111 Hüküm no: 58 Orijinal metin no: [30-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin evine bitişik olan arsaya bırakılan inşaat molozlarından dolayı evine verilen zararın tazmin olunması Kiliseye müceddeden binâ ihdâs eylemekle hâsıl olan molozu menzilimi harâb eyledi deyü da‘vâ Ma‘rûz, Edirnekapısı dâhilinde Ka‘riye Câmi‘i kurbünde Alipaşa-i atik mahâllesinde vâki‘ kenisede müceddeden binâ ihdâsı ve mahâlle-i mezbûrede vâki‘ kefere menzilleri altlarından çıkarılan moloz vaz‘ıyla Müslimîn menzilleri esâsına ızrâr olunmuşdur deyü mübârek rikâb-ı müstetâba verilen arzuhâl hâmişinde sâdır olan fermân-ı âlîlerine imtisâlen arzuhâlde imzâsı olan ahâlî-i mahâlle-i mezbûreden Ali Beşe nâm kimesne meclis-i şer‘-i şerîfe gelip zikr olunan moloz mebniyen iki yüz guruş kıymetli menzilimi yıkdı deyü mezkûr molozu vaz‘ edenlerden olmak üzere ihzâr-ı şer‘-i şerîf eylediği kenise-yi merkūm mütevellîsi Manol nâm zimmî ile menzili ittisâlinde vâki‘ vakıf arsa mütevellîsi Panayot nâm zimmîler ta‘addîlerini inkâr etmeleriyle, an-inkâr rızâlarıyla otuz guruş bedel-i makbûza mezbûr Ali sulh olup menzilinin kıymetine müte‘allıka da‘vâdan mesfûr zimmîlerin zimmetlerini ibrâ ve iskāt etdikden sonra istikşâf-ı hâl için kıbel-i şer‘-i şerîfden keşif nâibimiz es-Seyyid Halil Efendi dâ‘îleri irsâl, ol dahi hâlâ ser-mi‘mârân-ı hâssa ağa kulları ve sâir ümenâ-yı şer‘le sâlifü’z-zikr keniseye varıp mu‘âyene eylediklerinde içinde ve taşrasında eser-i tecdîd ve ta‘mîr meşhûd olmadığından mâ‘adâ ahâlî-i mahâlleden Ka‘riye İmam-ı sânî Mustafa Efendi ve Mehmed Said Efendi ve es-Seyyid Mehmed ve el-Hâc Ahmed ve Hâfız Ahmed Efendi ve es-Seyyid Mehmed Sadık Efendi ve sâir cerîdede mazbûtü’l-esâmi otuz nefer Müslimînden dahi istihbâr eylediğinde bu esnâda tecdîd ve ta‘mîr olunduğu meşhûd ve ma‘lûmumuz değildir deyü ba‘de’l-ihbâr zikr olunan arsa dahi kırk iki senesinde muhterik olup hâlî olmağla üzerinde terâküm eden molozun vâzı‘ı dahi ma‘lûm olmayıp lâkin bir sene mukaddem Pirinçci Anaştaş nâm zimmî menzilinden bir mikdâr moloz ilkā eylediğini ba‘zıları haber verip ve mukaddemâ terâküm eden molozdan Havva nâm hatunun menzilinin bir direği müteessir olmağla arsa mütevellîsi mesfûr Panayot rızâsıyla tecdîd ve es-Seyyid Ali nâm kimesne ile Hadîce nâm hatunun dahi müteessir olan duvarlarının derzlerini malından teberru‘an yapmak üzere ta‘ahhüd etdikde onlar dahi râzılar olduklarını mezbûr dâ‘îleri mahâllinde tahrîr ve gelip inhâ etmekle vâki‘ hâl ber-mûceb-i emr-i âlî huzûr-ı âlîlerine i‘lâm olundu. Fî 21 Zilka‘de sene 1179