İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 112 Hüküm no: 59 Orijinal metin no: [30-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bekir Paşa Hamamı Külhancısı Ohan’ın Avanis ve Bogos aleyhindeki alacak davasından men olunması Hukūk, 550 [guruş] Ma‘rûz, Karahisar-ı şarkī kazâsına tâbi‘ Tamarza nâm karye ahâlîsinden olup mahmiye-i İslambol’da Bekir Paşa Hamamı Külhancısı arzuhâl eden Ohan v. Serkiz Çarşamba günü dîvân-ı âlîde ma‘kūd meclis-i şer‘-i münîrde ahâlî-i mezbûreden Fazlı Paşa Sarayı’nda peştemâlciler hanında müsâfir olan arzuhâlde mezkûr Avanis v. Sahak ve Bogos v. Arakil muvâcehelerinde merkūmân Avanis ve Bogos dört sene mukaddem bir fermân ihrâcı husûsu için karye-i mezbûreden gāib ani’l-meclis Hanguroğlu? Haçador nâm zimmîyi taraflarından irsâl ve bi-şarti’r-rücû‘ emirleriyle mesfûr Haçador’a malımdan beş yüz elli guruş vermemle hâlâ meblağ-ı medfû‘-ı mezkûru merkūmâna rücû‘ ederim deyü da‘vâ ve merkūmân cevâblarında müdde‘î-i merkūm Ohan yetmiş altı senesi Muharremi gurresinde meblağ-ı mezkûru bizden da‘vâ ve yüz elli guruş bedel-i makbûza bizimle sulh olup meblağ-ı mezkûra müte‘allıka âmme-i da‘vâdan bizim zimmetimizi ibrâ ve iskāt edip hattâ ber-vech-i muharrer bizim ile meblağ-ı mezkûru yüz elli guruşa sulh ve mâ‘adâ da‘vâsından ibrâ eylediğini on iki gün mukaddem han-ı mezkûrda ikrâr ve işhâd dahi etmiş idi deyü ba‘de’d-def‘ ve’l-inkâr merkūmân Avanis ve Bogos def‘-i meşrûhlarını lede’t-tezkiye udûl-i millet-i Nasârâdan oldukları Müslimînden istihbâr olunan mahâll-i mezkûrda mütemekkin Bedros v. Hannan ve Minas v. Kevork nâm zimmîler şehâdetleriyle isbât etmeğin mûcebiyle müdde‘î-i merkūm Ohan bî-vech mu‘ârazadan men‘ olunduğu tescîl ve mübâşirleri Kapıkethüdâsı Süleyman kulları iltimâsıyla huzûr-ı âlîlerine i‘lâm olundu. Fî 21 Zilka‘de sene 1179.