İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 113 Hüküm no: 60 Orijinal metin no: [31-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sünbüle ve kardeşi İsar’ın Manol v. Foti aleyhindeki kira davasında anlaşma sağlanması İcâreden Sulh, 150 guruş, Ma‘rûz, Mahmiye-i İstanbul’da Samatya kurbünde Hacce Kadın mahâllesinde mütemekkine kendi tarafından asıl ve karındaşı Sünbüle tarafından vekîl olan şahsı mu‘arrefe İsar bt. Yani nâm Nasrâniye meclis-i şer‘-i hatîrde mahâlle-i mezbûrede vâki‘ menzili tahtında bir bâb mahzende müşâhereten müsteciri Manol v. Foti muvâcehesinde mahzen-i merkūm dört sehim i‘tibârıyla iki sehmi benim ve bir sehmi müvekkilem karındaşım mezbûre Sünbüle’nin ve bir sehmi dahi işbu hâzır bi’l-meclis sarrâf Avanis tasarrufunda olmağla merkūm Manol benim hissemi her şehr yirmi ikişer guruşa ve karındaşım mezbûrenin hissesini on beş guruşa ki cem‘an otuz yedi guruş bizden isticâr ve işbu yetmiş dokuz senesi Muharem’nin on üçüncü gününden beri dokuz ay taht-ı icâresinde olmağla şuhûr-ı mezkûrede îcâb eden üç yüz otuz guruş icâreden bâkī merkūm Manol zimmetinde olan iki yüz on yedi guruşu taleb ederim deyü eylediği da‘vâsından bâ-vesâtet-i müslimîn yüz elli guruş bedel üzerine asâleten ve vekâleten merkūm Manol ile sulh olup ve bedel-i merkūm yüz elli guruşu bi-kadri’l-hısas ahz u kabza ve ziyâde yetmiş yedi guruşa müte‘allıka da‘vâdan merkūm Manol’ün asâleten ve vekâleten zimmetini ibrâ-i küllî ile ibrâ ve iskāt ve kat‘-ı münâza‘a eyledikleri mübâşiri Mehmed Çavuş kulları iltimâsıyla huzûr-ı âlîlerine i‘lâm olundu. Fî 14 Zilka‘de sene 1179.