İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 113 Hüküm no: 61 Orijinal metin no: [31-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadiye bt. Mehmed’in vefat eden kocası Hüseyin’den satın aldığını iddia ettiği menzil ve mahzenin satışının geçersiz olduğu ve gayrımenkullerin oğlu Ali’ye intikal ettiği Bezzâz-ı cedîd mahâllesinde vefât eden Na‘alcı Hüseyin zevcesi üzerine etdirdiği mahzen intikāl-i âdiyle oğluna Ma‘rûz, Mahmiye-i İslambol’da Bezzâz-ı cedîd mahâllesinde sâkin iken işbu yetmiş dokuz senesi Muharremi’nin on beşinci günü vefât eden Na‘alcı Hüseyin b. Ali’nin sulbî kebîr oğlu arzuhâl eden Ali meclis-i şer‘-i hatîrde nezâret-i dâ‘îlerinde olan evkāfdan Ferhad Paşa Vakfı’ndan mahâlle-i mezbûrede vâki‘ etrâf-ı erba‘ası Tabîb Mehmed Efendi ve Mühürdar Mustafa Ağa ve Masdariyecioğlu menzili ve tarîk-i âm ile mahdûd menzil ile Şir Ali Paşa Vakfı’ndan olan Bezzâz-ı cedîd câmi‘i tahtında vâki‘ iki kat ve bir bâb kârgîr mahzene vâzı‘atü’l-yed olan üveyi anası zâtı mu‘arrefe Sadiye bt. Mehmed mahzarında menzil-i mezkûr ile mahzen-i merkūm vakfeyn-i mezkûreyn taraflarından babam mezbûr Hüseyin’in bi’l-icâreteyn taht-ı tasarrufunda olmağla mezbûre Sadiye menzil-i mezkûrun rub‘unu mukaddemâ babam mezbûrun rızâsıyla bâ-re’y-i mütevellî üzerine etdirmişken babam mezbûr hasta ve gālib-i hâli helâk oldukda Câbî Mehmed nâm kimesne ile mahâllemiz imamını itmâ‘, onlar dahi Ferhad Paşa mütevellîsine varıp menzil-i mezkûrun selâse-i erbâ‘ını dahi mezbûr Na‘alcı Hüseyin zevcesi Sadiye ferâgat eyledi demeleriyle mütevellî dahi defter-i vakfa kayd ve ba‘dehû Şir Ali Paşa Vakfı mütevellîsi Mustafa Ağa nâm kimesneye biraz akçe verip mahzen-i mezkûrun nısfını dahi fevtinden dokuz gün mukaddem târîhiyle üzerine temessük [ve] tahrîr etdirdip bu vechile bana gadr etmekle menzil-i mezkûrun selâse-i erbâ‘ı ile mahzen-i merkūmun nısfını âdiyen taleb ederim deyü mârrü’z-zikr mütevellîler tarafından vekîlleri hâzır olduğu hâlde da‘vâ etdikde mezbûre Sadiye cevâbında zevcim mezbûr Na‘alcı Hüseyin hâl-i hayâtında menzil-i mezkûrun selâse-i erbâ‘ı ile mahzen-i mezkûrun nısfını hüsn-i rızâsıyla bana ferâgat etmiş idi deyü def‘ sadedinde olup lâkin menzil-i mezkûrun ferâğı için Ferhad mütevellîsinden istihbâr olundukda defter-i vakıfda târîh-i ferâğı mezbûr Na‘alcı Hüseyin’in fevti târîhinden bir gün sonra vâki‘ olduğu mukayyed olduğundan mâ‘adâ mahzen-i merkūmun ferâğı için ikāme eylediği bir nefer kimesne meclis-i şer‘de şehâdetinden rücû‘ ve ücretle geldiğini ikrâr ve şâhid-i âhar ikāmetine kādire olamayıp zikr olunan ferâğları müzevver olup mu‘teber olmadığı lede’ş-şer‘i’ş-şerîf zâhir olduğundan gayrı mahâlle-i mezbûre ahâlîsinden Hatîb Mehmed Efendi ve kurbünde vâki‘ İbrahim Paşa Câmi‘-i şerîfi imamı Abdullah Efendi ve Müezzin el-Hâc Hasan Efendi ve Sahâf es-Seyyid Halil Efendi, Vekîlharç Hasan Ağa ve Esîrî el-Hâc Mehmed ve Bogasici el-Hâc Abdullah ve Yorganî el-Hâc Ahmed ve Kayyûm Molla Hüseyin ve Mustafa Çelebi ve Çıkrıkçı Mehmed ve Hüseyin Beşe ve Molla Mustafa ve diğer Mustafa Çelebi ve es-Seyyid el-Hâc Ebubekir ve el-Hâc İsa ve Nahılcı Ahmed ve Leblebici Mehmed ve Nâtur Ahmed nâm kimesneler meclis-i şer‘-i şerîfe hâzirûn olup mezbûre Sadiye zikr olunan ferâğları mezbûr Na‘alcı Hüseyin’in fevtinden sonra peydâ ve oğlu mezbûr Ali’ye bu vechile gadr eyleyip ve hattâ bundan akdem mezbûr Ali’ye anasından intikāl eden üç yüz guruşlukdan ziyâde eşyâsını itlâf ve izâ‘at ve babası hacrinden tarda sebep olmuş bir gaddâredir deyü alâ-tarîkı’ş-şehâde ve’t-tevâtür haber vermeleriyle mezbûre Sadiye’nin bu vechile etdirdiği ferâğlar mu‘teber olmayıp intikāl-i âdî ve mütevellîleri re’yleriyle oğlu mezbûr Ali üzerine tahrîr olunmak iktizâ eylediği Mübâşir Eyüb Çavuş kulları iltimâsıyla huzûr-ı âlîlerine i‘lâm olundu. Fî 21 Zilka‘de sene 1179.